Qaraǵandy kásiporyndary jarty jylda 1 trıllıon teńgege ónim óndirgen
ASTANA. QazAqparat - Qaraǵandy oblysynda alty aıda 1,05 trln teńgege ónerkásip ónimderi óndirilgen, dep habarlaıdy ákimdiktiń resmı saıty.
Ónerkásip kólemi boıynsha Qaraǵandy oblysy elimizde ekinshi orynda tur. Respýblıkalyq óndiristegi oblysymyzdyń úlesi - 10%.
Alǵy shepte óńdeý ónerkásibi tur. Bul sektorda jarty jylda 811,6 mlrd teńgege ónim óndirilgen eken. Ótken jylmen salystyrǵanda ol kórsetkish 3,4%-ǵa artqan.
Óńdeý ónerkásibindegi eńbek ónimdiligi 5,1%-ǵa - adam basyna 20,4 AQSh dollaryna deıin ósken. Bul elimiz boıynsha eń úzdik kórsetkish.
Ónerkásiptiń negizgi salalarynda da ósim baıqalady - metallýrgııa, mashına qurastyrý, hımııa ónerkásibinde, farmatsevtıkada.
Eseptik kezeńde ónerkásip kásiporyndarynyń negizgi kapıtalyna 73,7 mlrd. teńge quıylǵan. Bul somanyń jartysyna jýyǵy (38 mlrd teńgeden astamy) óńdeý ónerkásibine tıesili.
Kásipkerlerdi qoldaý kartasy boıynsha oblysymyzda 80 ındýstrıaldy jobalar iske qosylǵan, olarda 6000-nan astam jumys oryndary ashylǵan. Alty aı ishinde bul óndiris oryndary 84 mlrd teńgege ónim óndirgen. Salystyra ketsek, bul Soltústik-Qazaqstan oblysy ónerkásibi kóleminiń 80%-y, Jambyl oblysy kóleminiń jartysyna teń.
2017-shi jylǵa 9,3 mlrd teńgege 9 jobany iske qosý josparlanyp otyr. Olarda 500-den astam jańa jumys oryndary qurylady dep kútilýde. Olardyń ishinde 3,5 mlrd teńgeni quraıtyn 3 joba iske qosylǵan. Jańa kásiporyndarda 159 jańa jumys orny ashylady.
