Qaraǵandy kásipkerleri «Týǵan jer» baǵdarlamasy aıasynda 5 mlrd teńge jınady

ASTANA. QazAqparat - Qaraǵandylyq kásipkerler «Týǵan jer» baǵdarlamasyn júzege asyrý aıasynda 5 mıllıard teńge jınady. Bul týraly Ortalyq kommýnıkatsııalar qyzmetinde baspasóz máslıhatyn ótkizgen Qaraǵandy oblysynyń ákimi Erlan Qoshanov málim etti, dep habarlaıdy «QazAqparat» HAA tilshisi.

«Týǵan jer» baǵdarlamasy boıynsha óńirimizde aıtýly jumystar atqyrylyp jatyr. Biz 13 mlrd teńge bolatyn 400-den asa iri áleýmettik jobalardy iske asyrýdy bastadyq. Onyń 5 mıllıardtan astamy jeke tulǵalardyń úlesinde», - deıdi oblys ákimi.

Erlan Qoshanovtyń aıtýynsha, «Shahtersk» dep atalatyn sharýa qojalyǵynyń ókilderi óz aýylyna 260 mıllıon teńge turatyn úlken sport keshenin ózderi salyp, memleketke tartý etken.

«Mundaı mysaldardy oblysymyzda kóptep keltirýge bolady. Degenmen de, «Rýhanı jańǵyrý» tek qana metsenattardan qarjy jınaý ǵana emes, eń bastysy ortaq maqsatqa árbir qaraǵandylyqtyń belsendi túrde atsalysatynyna senimdimiz», - deıdi Erlan Qoshanov.