Qaraǵandy qalasynyń mektepke deıingi uıymdary qalypty rejımde jumys isteıtin bolady

Barlyq mektepke deıingi mekemelerde vırýstyq aýrýlardyń aldyn alý sharalary kúsheıtildi, dep habarlaıdy QazAqparat tilshisi.

Oblystyń barlyq balabaqshalary shtattyq rejımde jumys isteıtin bolady. Biraq eger ata-analar balasyn belgili bir ýaqyt úıde bolady dep sheshim qabyldasa, ol týraly balabaqsha ákimshiligine jazbasha túrde habarlaýy tıis. Tamaqtaný úshin tólem qaıta eseptelip, balanyń orny saqtalady. Juqpaly jáne vırýstyq aýrýlardyń aldyn alý boıynsha is-sharalar kúsheıtilýde: dezınfektsııalaý quraldaryn qoldana otyryp, ylǵaldy jınaý jıiligi ulǵaıtyldy, úı-jaılardy jeldetý, kvartstaý rejımi qatań saqtalady. Tamaqtaný jáne sý ishýdi uıymdastyrý erekshe baqylaýda.

«Barlyq mektepke deıingi uıymdarda qajetti mólsherde jýý quraldary, qol gıgıenasy men dezınfektsııalaýǵa arnalǵan quraldar bar. Balalarda vırýsty ınfektsııa belgileri bolǵan kezde tańerteńgilik «súzgi» júrgiziledi, balalar mektepke deıingi uıymdarǵa jiberilmeıdi. Eger mundaı belgiler paıda bolsa, onda balalardy ızolıatorǵa ornalastyryp, ata-analarǵa balany alyp ketý qajettiligi týraly habarlaıtyn bolady», - dep habarlady oblystyq densaýlyq saqtaý basqarmasynyń baspasóz qyzmeti.

Mamandar aldyn alýdyń mańyzdy faktory - balaǵa jeke gıgıena daǵdylaryn úıretý bolyp tabylatynyn jáne tárbıeshi men ata-analardyń birlesken qyzmeti mańyzdy ekenin atap aıtty.