Qaraǵandy ​​qalasynyń gaz jelileri ulttyq operatorǵa berildi

NUR-SULTAN. QazAqparat - «Saryarqa» magıstraldyq gaz qubyrynyń arqasynda el astanasy men ortalyq óńirlerdi gazdandyrý jumystary qarqyndy jalǵasýda. Qaraǵandy ​​oblysynyń ákimdigi men «QazTransGaz Aımaq» AQ óndiristik fılıaly arasynda oblys ortalyǵynda salynǵan gaz taratý jelilerine senimgerlik basqarý sharty jasaldy, dep habarlaıdy QazAqparat.

Búgingi tańda 3 iske qosý kesheni men qala ishindegi gaz taratý jelileri paıdalanýǵa berildi. Bul jumystardy jergilikti atqarýshy organdar memlekettik bıýdjet esebinen júzege asyrdy. Qaraǵandyda bıylǵa josparlanǵan 65 shaqyrym gaz qubyry tolyq salyndy. Al oblys boıynsha 1500 km gaz qubyrynyń 129 shaqyrymy daıyn. Oblys ortalyǵynda osyǵan deıin kómir jaǵyp kelgen 1505 jeke turǵyn úıdi kógildir otynǵa aýystyrýǵa múmkindik bar, al óńir boıynsha mundaı tutynýshylar sany – 2472.

Búgingi tańda Jezqazǵanda 37 shaqyrymǵa jýyq gaz qubyry salynyp, paıdalanýǵa berildi. Sonymen qatar, jobada avtomatty gaz taratý stansasy men gaz qysymyn retteý pýnkteriniń qurylysy qarastyrylǵan. Gazben jabdyqtaý júıesiniń 1-kezeńinde 519 abonent kógildir otynǵa qosyla alady.

Temirtaýda «QazTransGaz Aımaq» AQ senimgerlik basqarý sharty boıynsha 27,8 shaqyrym gaz qubyry berildi. Munda da jobaǵa sáıkes avtomatty gaz taratý stansasy men gaz qysymyn retteý pýnkteri salynyp, birinshi kezeńde 448 abonent gazben qamtamasyz etiledi.

Búgingi tańda Qaraǵandy, Temirtaý jáne Jezqazǵan qalalarynda birinshi iske qosý keshenderiniń qurylysy tolyq aıaqtaldy, ekinshi keshenderdiń qurylysy júrgizilýde.

2019 jyldyń qarasha aıynda «QazTransGaz Aımaq» AQ Qaraǵandy ​​óndiristik fılıaly jumysyn bastady. Mekeme taratý júıeleri arqyly gazdy tasymaldap, tutynýshylardy kógildir otynmen qamtamasyz etedi.

«QazTransGaz Aımaq» AQ Qaraǵandy óndiristik fılıalynda qurylǵan abonenttik bólimde úılerdi gazben jabdyqtaý júıesine qosý boıynsha tolyq aqparat pen tehnıkalyq sharttar alýǵa bolady.

Joba boıynsha Qaraǵandyda 29 528 úıdi gazben qamtamasyz etetin – 16, Temirtaýda 4 498 úıge arnalǵan – 8, Jezqazǵanda 4 562 úıge arnalǵan 6 iske qosý keshenin salý josparlanǵan.