Qaraǵandy qalasynyń ákimi óz komandasymen naýqas balalar úshin qan tapsyrdy
QARAǴANDY. 1 maýsym. QazAqparat - Búgin Qaraǵandyda memlekettik qyzmetkerler naýqas balalar úshin qan tapsyryp, donor atandy. Bul týraly qala ákiminiń baspasóz qyzmeti habarlady.
«Qaraǵandy qalasynyń ákimi Baýyrjan Ábdishevtiń basqarýymen ákimdiktiń jáne basqa da memlekettik qurylymdardyń qyzmetkerleri naýqas búldirshinder úshin qan tapsyrý aqtsııasyna atsalysty. 50-den astam adam ıgilik sharasyna qatysyp, donor atandy», - delingen baspasóz qyzmeti taratqan habarlamada.
Qalanyń bılik ókilderi múgedek balalarǵa da kóńil bóldi. «Memlekettik qurylymdardyń qyzmetkerleri múmkindigi shekteýli 50-den astam balalardyń úıine baryp, syılyq tabys etti», - dep habarlady qala ákiminiń baspasóz qyzmeti.
Qala ákimi balalarǵa oıynshyqtar men kitaptar jáne táttiler syılady.
