Qaraǵandy qalasyndaǵy «Absolıýt» saýda ortalyǵy otqa orandy, 22 adam qutqaryldy (FOTO)
QARAǴANDY. QazAqparat - Búgin, 21 jeltoqsanda saǵat 17:19-da Qaraǵandydaǵy Qazybek bı aýdany, Buqar jyraý dańǵylynda ornalasqan «Absolıýt Qazaqstan» saýda ortalyǵynda órt bolǵandyǵy jóninde habarlama tústi.
Bul týraly Qaraǵandy oblysynyń TJD Memlekettik til jáne aqparat toby habarlady.
Bul nysanda shatyrdyń aǵash qurylymy, dúńgirshekter men 2-shi qabattaǵy taýar-materıaldyq qundy zattar otqa oranǵan. Jalyn tili shamamen 1400 sharshy metrdi sharpyǵan. Barlyq kúshter adamdardy qutqaryp, qaýipsiz jerge kóshirýge jáne órtti sóndirýge jumyldyryldy. Órt kezinde 22 adam qutqaryldy.
Órt sóndirýge: QR ІІM TJK Qaraǵandy oblysynyń TJD Órt sóndirý qyzmetiniń jeke quramynan 90 adam jáne 24 birlik tehnıka (15 negizgi, 9 arnaıy tehnıka), Apattar medıtsınasy ortalyǵynyń jeke quramynyn 3 adam men 1 birlik tehnıka, «Qaraǵandy Sý» JShS 1 adam men 1 birlik tehnıka, ІІ bóliminiń jeke quramynan 143 adam men 16 birlik tehnıka jumyldyryldy.
