Qaraǵandy qalasynda jylý tutynýdy eki esege azaıtatyn termojańǵyrtý jobasy engiziledi - S. Nokın
ASTANA. 24 qańtar. QazAqparat /Qanat Mámetqazyuly/ - Aǵymdaǵy jyly Qaraǵandy qalasynda turǵyn úılerge Shyǵys Eýropanyń termojańǵyrtý tájirıbesi engiziletin bolady.
Atalǵan joba jylý tutynýdy eki esege deıin únemdeıdi. Bul týraly búgin QR Parlamenti Májilisinde ótken Úkimet saǵatynda Qurylys jáne turǵyn úı kommýnaldyq sharýashylyq isteri agenttiginiń tóraǵasy Serik Nokın málim etti.
Agenttik tóraǵasynyń aıtýynsha, byltyr Qaraǵandy qalasynda turǵyn úı kómegin paıdalana otyryp, basqarýshy kompanııa arqyly turǵyn úılerdi jóndeýden ótkizýdiń ilki jobasy bastalǵan bolatyn. Al búgingi kúni atalǵan basqarýshy kompanııa tabysy tómen otbasylarǵa turǵyn úıdi jóndeýdiń kómegin rásimdeýdi júrgizýdi bastady.
«Qaraǵandy qalasyndaǵy bundaı ilki jobany iske asyrý nátıjesinde Shyǵys Eýropanyń termojańǵyrtý tájirıbesi engiziletin bolady. Bul turǵyn úıdegi jylý tutynýdy eki esege deıin únemdeıdi. Sonymen qatar, ǵımarattardyń tóbe jabyndysy jóndeledi, qasbeti jańǵyrtylady. Mundaı jobalardy basqa óńirlerde iske asyrý úshin turǵyn úı ınspektsııasynyń jumysyn jappaı uıymdastyrý mańyzdy. Alaıda, qazirgi kúni bundaı ınspektsııalar Aqmola, Jambyl, Qostanaı oblystarynda áli de uıymdastyrylmaı otyr», - dedi S. Nokın. Budan bólek turǵyn úılerdi termojańǵyrtý jáne jóndeý júrgizý úshin páter ıelerine qolaıly ári uzaq merzimdi kredıtterge múmkindik qarastyratyn qarjy quraly qajet. «Bul álemdik tájirıbede bar úrdis», - deıdi ol.
