Qaraǵandy qalasynda jańa emhana ashylady
QARAǴANDY. QazAqparat - Qaraǵandy qalasynyń Vostok-2 yqsham aýdanynda mamyrda jańa emhana qoldanysqa beriledi, dep habarlaıdy QazAqparat tilshisi.
Qaraǵandy oblystyq densaýlyq saqtaý basqarmasynyń jetekshisi Erjan Nurlybaevtyń aıtýynsha, Qaraǵandy oblysynda densaýlyq saqtaý salasynda memleketik-jekemenshik áriptestigi aıasynda 11 joba júzege asyrylýda.
«Bizdegi negizgi problemalardyń biri - úlken emhanalar men olarǵa bekitilgen turǵyndardyń kóptigi. Búgingi tańda bizdiń emhanalarda 50-60 myń adam tirkelgen. Jaǵdaıdy ózgertý úshin oblysta birqatar jobalar ázirlendi. Oblys ortalyǵynda jáne óńirdiń basqa da qalalarynda shaǵyn otbasylyq densaýlyq ortalyqtaryn ashýdy josparlap otyrmyz», - dep túsindirdi Erjan Nurlybaev.
Bıylǵy jyly Jezqazǵan qalasyndaǵy eki jylǵa josparlanǵan joba aıaqtalady. Munda aýrýhana qalashyǵy paıda bolady. Densaýlyq saqtaý kesheninde qala turǵyndaryna qazirgi zamanǵy medıtsınalyq jabdyqtarmen jabdyqtalǵan keńes berý-dıagnostıkalyq ortalyq qyzmet kórsetedi dep josparlanýda. Qazirgi tańda atalmysh ortalyqta jumys isteıtin qyzmetkerler biliktilikterin jetildirip jatyr.
Sondaı-aq, oblystyq travmatologııa ortalyǵynyń negizinde zamanaýı keńes berý-dıagnostıkalyq ortalyǵy ashylady. Jańa nysan emdelýshilerdi qabyldaý múmkindigin 20% ulǵaıtýǵa múmkindik beredi.
«1 mamyrǵa deıin biz Vostok-2 shaǵyn aýdanyndaǵy jańa emhanany paıdalanýǵa beremiz. Al tamyz aıynda Prıshahtınskide jańa balalar emhanasy men áıelderge keńes beretin mekeme iske qosylady. Bizdiń esepteýimiz boıynsha, bul emhanaǵa 17 myńǵa jýyq bala tirkeledi», - dedi Qaraǵandy oblysy densaýlyq saqtaý basqarmasynyń basshysy.
Erjan Nurlybaev málimdegendeı, Temirtaý qalasyndaǵy emhana qurylysy sáýir aıynyń ekinshi jartysynda bastalýy tıis. Jańa nysandy aǵymdaǵy jyldyń jeltoqsan aıynda aıaqtaý josparlanyp otyr. Sondaı-aq, MJÁ aıasynda osy ýaqyt aralyǵynda Maıqudyqtyń 11-shi yqsham aýdanynda emhana salynatyn bolady. Sonymen qatar, bıyl Oktıabr aýdanynda qosalqy jedel járdem stantsııasynyń qurylysy aıaqtalady, Qaraǵaıly kenti men Ahmetaýyl aýylynda dárigerlik ambýlatorııalar, al Balqash qalasynda jańa emhana ashylady.
Sonymen qatar Nura aýdanynyń Shahterskoe aýylynda dárigerlik ambýlatorııa salý josparlanǵan. Al Qaraǵandyda feldsherlik-akýsherlik pýnktter ashylady dep kózdelip otyr.
