Qaraǵandy qalasynda qalyń tútinniń yqtımal sebepteri ataldy
QARAǴANDY. QazAqparat – Qaraǵandy qalasynyń turǵyndary keshki ýaqytta eselene túsetin qalyń tútinge shaǵymdanýda, dep habarlaıdy QazAqparat tilshisi.
Oblystyq Ekologııa departamentiniń málimetinshe, mamandar atmosferalyq aýanyń jaǵdaıyna monıtorıngini únemi júrgizedi. Synamalar oblys ortalyǵynyń barlyq aýdanynan alynady.
Ekologtardyń aıtýynsha, tútinniń paıda bolýyna birden birneshe faktor yqpal etedi.
«Jelsiz aýa raıynda nemese temperatýralyq ınversııa kezinde jeke sektordyń qatty otynmen janatyn peshiniń, sondaı-aq ónerkásiptik kásiporyndardyń tútini birden seıilip ketpeıdi. Bul atmosferanyń joǵary lastanýynyń sebebi bolyp tabylady. Jeke sektorda adamdar negizinen kómir jaǵatyny belgili. Sonymen qatar kólikterdiń qarqyndy qozǵalysy shyǵaryndylardyń jer betine shoǵyrlanýyn týdyrady», – dep atap ótti salalyq departamentten.
Aıta ketý kerek, Qaraǵandy aýmaǵynda atmosferalyq aýanyń jaı-kúıin baqylaý 7 bekette júrgiziledi, onyń ishinde tórteýi qolmen jáne úsheýi avtomatty túrde irikteledi. Sonymen qatar,qalada «Ekoservıs-S» JShS-nyń 10 baqylaý pýnkti jumys isteıdi.
Juma kúni ekologtar atmosferalyq aýa jaǵdaıyna kezekti monıtorıng júrgizdi. Nátıjeler keıinirek habarlanady.
Aıta ketý kerek, Ekologııa departamenti «Qazgıdromet» RMK fılıalynan aýa jaǵdaıynyń nasharlaǵany týraly habarlama kelgen bette synama alýǵa shyǵady.
