Qaraǵandy qalasynda 33 myńǵa jýyq kóshet otyrǵyzylady
QARAǴANDY. QazAqparat – Qazaqstan halqynyń birligi kúni Qaraǵandynyń eki aýdanynda aǵash otyrǵyzý aktsııasy ótti, dep habarlaıdy QazAqparat.
Demalystyń eki kúninde qalada úsh myńǵa jýyq kóshet otyrǵyzylýy tıis. Al aǵymdaǵy jyl ishinde jasyl qordy 33 myń aǵashpen tolyqtyrý josparlanyp otyr.
«Jappaı aǵash otyrǵyzý aktsııasy Qazybek bı jáne Oktıabr aýdandarynda ótti. Búgin Ońtústik-Shyǵysta 800 pıramıdalyq terek otyrǵyzyldy, Maıqudyqta, Prıshahtınskide jáne Suryptaý shaǵyn aýdandarynda shamamen 900 túp egildi. Olar mamyqsyz jáne jaqsy tamyr alady. Sondaı-aq, kompanııalardyń biri óz erkimen qaraǵaı otyrǵyzdy. Bıyl biz 33 myńǵa jýyq aǵash otyrǵyzyp, qalany kógaldandyrýdy josparlap otyrmyz. Bul - bıýdjet esebinen ótemdik otyrǵyzý jáne qaraǵandylyqtardyń bastamasy. Otyrǵyzylǵan barlyq aǵashty sýarýdy óz moınymyzǵa alamyz. Merdiger olarmen tamyr jaıǵansha aınalysatyn bolady», – dep atap ótti qala ákimi Ermaǵanbet Bólekpaev.
Qalany kógaldandyrý aktsııasyna oblys jáne qala basshylary, óńirlik QHA músheleri, eriktiler men turǵyndar qatysty.
«Aǵash otyrǵyzý – eń paıdaly jáne qajetti aktsııalardyń biri dep esepteımiz. Ekologııalyq is-sharalarǵa jastardyń belsendi qatysqanyn qalaımyz. Al biz óz tarapymyzdan aǵashtardy sýarýǵa kómektesetin bolamyz», – dep ýáde berdi «Jas Otan» Jastar qanaty Qaraǵandy oblystyq bólimshesiniń tóraǵasy Erjan Hamıtov.
