Qaraǵandy qalasy Jańa jyl merekesine qalaı bezendirildi

QARAǴANDY. QazAqparat – Osy qysta Qaraǵandynyń ortalyq saıabaǵynda adam óte kóp jınalýda. Jańadan salynǵan muz aıdyny kópshiliktiń qýana jınalatyn ornyna aınaldy. Bıyl muz jańa jyldyq shyrshanyń aınalasyna ǵana emes, kól boıyndaǵy alleıaǵa da quıyldy. Sonymen qatar kóldiń ózinde de syrǵanaýǵa bolady, dep habarlaıdy QazAqparat tilshisi.

Qala ákimi Ermaǵanbet Bólekpaevtyń aıtýynsha, Máskeýge saparlarynyń birinde ony Gorkıı saıabaǵyndaǵy jelilik muz aıdyny tańǵaldyrǵan.

Sodan beri osy ıdeıany júzege asyrýǵa asyqqanyn aıtady.

«Árıne, bizde sonshalyqty keremet emes. Biraq biz ol ıdeıany júzege asyra aldyq. Daıyndyqty jazdan bastadyq. Ýrbanıstıka ortalyǵynyń mamandarymen, saıabaq qyzmetkerlerimen birge bas qostyq. Bastapqyda jeti muz aıdynynyń nusqalary boldy. Qazir kórip otyrǵan nusqasyna toqtaldyq. Muz aıdynyn salý jáne saıabaqty bezendirý úshin qosymsha bıýdjet qarajaty qajet bolmady. Barlyǵy josparlanǵan qarjyǵa jasaldy. Tek tujyrymdamany ózgerttik», – deıdi qala basshysy.

Konkımen muzǵa shyǵý tegin. Konkıdi jalǵa alý ornyna kezek uzyn, sebebi syrǵanaǵysy keletinder sany jetip, artylady.

Olardyń qatarynda tájirıbeli de, jańadan kelgender de bar.

«Muz birtindep qabattap quıyldy. Kún saıyn tańerteń biz ony jańa kezeńge daıyndaımyz. Bizde muz aıdynyna kútim jasaýǵa arnalǵan arnaıy tehnıka joq, sondyqtan muzdyń betin tegisteý jumystaryn qolmen júrgizemiz. Muz aıdyny adamdarǵa unaıdy, aldaǵy ýaqytta qys boıy qoldaý kórsetetin bolamyz», – dedi Qaraǵandynyń mádenıet jáne demalys saıabaqtary basqarmasy basshysynyń m. a. Talǵat Smaıylov.

Saıabaqtaǵy bıik syrǵanaqtardan óz tıýbıngińizbenmen tegin syrǵanaı alasyz. Eger óz tıýbıngińiz bolmasa, jalǵa alýǵa bolady.

Saıabaqtar basqarmasynyń qyzmetkerleri serýendeýge arnalǵan oryndardy ásemdep bezendirýge tyrysty. Shaǵyn músinder móldir plastıkten jasalǵan.

Polıarlyq aıýlar, pıngvınder men buǵy janynda balalar men eresekter qýana sýretke túsýde.

Jolbarystyń Jańa jyldyń sımvoly da kelýshiler arasynda tanymal, ony saıabaq basqarmasynyń sýretshisi jasaǵan.

Ortalyq kireberiste kelýshilerdi esek pen Aıaz Ata qarsy alady.

Qalada tegin muz aıdyndary «Shahter» jáne «Lokomotıv» stadıondarynda jumys isteıdi. Sonymen qatar, olar mektepterdiń janynda quıylady.

Qala ortalyǵyndaǵy Nursultan Nazarbaev pen Núrken Ábdirov dańǵyldary da jańasha bezendirildi. Aǵashtar jarqyraǵan saqınalarmen áshekeılengen.

Ashyq túster men shamdar adamdarǵa jańajyldyq kóńil-kúı syılaıdy.