Qaraǵandy qalalyq jer qatynastary bóliminiń basshysy tutqyndaldy
QARAǴANDY. QazAqparat - Para aldy degen kúdikpen Qaraǵandy qalalyq jer qatynastary bóliminiń basshysy tutqyndaldy, dep habarlaıdy QazAqparat tilshisi.
Sybaılas jemqorlyqqa qarsy is-qımyl ulttyq bıýrosynyń Qaraǵandy oblysy boıynsha departamentiniń tergeý-jedel toby sot sanktsııasymen Sabyrjan Dáýitbergenovti eki aıǵa qamaýǵa aldy.
«Jasalǵan qylmystyń mán-jaıy bizge belgisiz. Sot bultartpaý sharasyn sanktsııalaǵan kezde dáleldemelerge baǵalaý júrgizgen joq jáne olarǵa taldaý jasaǵan joq. Sabyrjan Dáýitbergenov Qylmystyq kodekstiń 366-babynda («laýazymdy tulǵanyń para alýy») kórsetilgen qylmysty jasady degen kúdikpen eki aı merzimge qamaýǵa alyndy», - dep habarlady sottan.
Buǵan deıin ákimshilik sot Dáýitbergenovti dúńgirshekterdiń ıelerimen jer ýchaskelerin jalǵa alý týraly kelisimsharttardy jasasý jónindegi sot sheshimin oryndamaǵany úshin aıyppul tóleýge mindettegen bolatyn. Bul protsesterge Dáýitbergenovtiń ózi, ne bolmasa basqaryp otyrǵan bóliminiń zańgerleri kelmedi. Osyǵan oraı sot Memlekettik qyzmet isteri jáne sybaılas jemqorlyqqa qarsy is-qımyl departamentiniń Ádep jónindegi keńesine hat joldaǵan bolatyn. Ádep jónindegi keńestiń otyrysynda sheneýnik sottardy jaǵalap júretin ýaqyty joqtyǵyn málimdedi. Keńes músheleri ony tártiptik jaýapkershilikke tartpady.
