Qaraǵandy - IT keńistiktiń bastaý alańy

QARAǴANDY. QazAqparat - Kenshiler qalasynda tek elimizdiń óndiristik aımaǵy bolyp qana qoımaı, sonymen qatar tsıfrlyq tehnologııalardy damytý ortalyǵyna aınalý áleýeti paıda boldy. Álemge tanymal ІT-mamandar Qaraǵandyny Terrıkon alqaby ataýdy usyndy, dep habarlaıdy QazAqparat.

Tórt kún aralyǵynda Qaraǵandyda "IT-WEEKEND.KZ - 2018" halyqaralyq forýmy ótti. Sharaǵa barlyq aımaqtardan jáne basqa elderden joǵary tehnologııa mamandary jınaldy. Forýmnyń «Qaraǵandy - ІT-keńistiktiń bastaý alańy» atty basty paneldik sessııasyna Qaraǵandy oblysynyń ákimi Erlan Qoshanov qatysty. Aımaq basshysy óz sózinde búgingi tańda ІT-naryq - barlyǵymyz úshin keremet múmkindikter jáne bastama pozıtsııalar bolyp tabylatynyn atap ótti.

«Elbasynyń bastamasynyń arqasynda elimizde «Tsıfrlyq Qazaqstan» baǵdarlamasy júzege asyrylýda. Aldyńǵy qatarly elder tsıfrlandyrýǵa ondaǵan jyldar boıy qatelikter men tájirıbeler arqyly jetken. Bul álemdik tájirıbe ІT-salany damytýǵa arnalǵan strategııa bolyp tabylatyn «Tsıfrlyq Qazaqstan» baǵdarlamasynda eskerilgen», - dep qosty Erlan Qoshanov.   

Uıymdastyrýshylardyń aıtýynsha,Qaraǵandy ІT-forýmdy ótkizetin jer retinde bekerden tańdalǵan joq. Qalada JOO jáne mamandandyrylǵan kolledj negizindegi myqty matematıkalyq mektep bar. Qaraǵandylyq baǵdarlamaýshylar Google sekildi álemniń aldyńǵy qatarly ІT-kompanııalarynda qyzmet etedi. Buǵan qosa, oblysta tsıfrlyq «erekshelikter» engizilip jatqan sátti úlgiler bar.  Mysaly, densaýlyq saqtaý jáne bilim berý salasy kóptegen nátıjelerge qol jetkizgen. Úıde otyryp, dárigerdiń qabyldaýyna jazylýǵa, medıtsına qyzmetkerin úıge shaqyrýǵa jáne qajetti dári-dármektiń retseptin jazǵyzyp alýǵa múmkindik beretin Damý med qosymshasy sátti jumys istep jatyr. Qaraǵandylyq  IT mamandardyń zerttemesi qazirgi kúni Qazaqstannyń barlyq qalalarynda qoldanysqa engizildi. Tek Qaraǵandynyń ózinde-aq bul qosymshamen 300 myńnan astam adam paıdalanady. 

«Munda, Qaraǵandyda matematıkalyq oı órisi damyǵan, osy salada ózińmen teń adamdarmen sóılese alasyń. Osynda qazir jastar, tájirıbeli mamandar, tabysty kásibı qyzmetkerler, ǵylym men bılik ókilderi ózara baılanys ornatyp, draıv quryp, jańashyldyqtar oılap taýyp, ózderin de, óńirdi de, jalpy eldi damytýǵa talpynatyn biregeı alań qurylyp jatyr», - dedi sessııada depýtat Pavel Kazantsev.

Óz kezeginde,forýmǵa qatysýshylar qaraǵandylyq ІT habty Terrıkon alqaby dep ataýdy usyndy.

-Sılıkon alqaby bar, al Qaraǵandyda óziniń Terrıkon alqaby bolady. Men ony qoldaımyn, - dedi Erlan Qoshanov.

Osyǵan oraı aımaq basshysy óziniń orynbasary Almas Aıdarovqa jáne «Qaraǵandy oblysynyń aqparat, memlekettik qyzmetterdi kórsetý jáne muraǵattar» MB jetekshisine tapsyrma berdi.

Sessııa sońynda Erlan Qoshanov forým sheńberinde ótken hakaton jeńimpazdaryna aqshalaı sertıfıkattar tabys etti. Jeńimpazdar 500 000 teńgeden ıelendi jáne buǵan qosa  QMMÝ stýdentteri atandy. Olar múmkindigi shekteýli adamdarǵa nemese tósek tartyp qalǵan naýqasqa kómekshi nemese aýrý kútýshi taýyp alýǵa bolatyn mobıldi qosymsha jasap shyǵarǵan.