Qaraǵandy ІT habynyń túlekteri Kremnıı alqabynda bilim alyp jatyr

QARAǴANDY. QazAqparat – On bes áleýetti qazaqstandyq startapshy AQSh-qa oqýǵa ketti. Olardyń ishinde «Terrıkon alqaby» Qaraǵandy IT habynyń tórt túlegi bar, dep habarlaıdy QazAqparat tilshisi.

Startaptar «Kremnıı alqabynda» qarqyndy akseleratsııa baǵdarlamasynan ótedi. Bul olarǵa óz jobalaryn halyqaralyq naryqqa shyǵarýǵa múmkindik beredi.

«Smartestprep jáne Alaqan jobalarynyń komandalary Scalerator-dan ótti, onda «Terrıkon alqaby» operator boldy jáne tikeleı qatysty. Al, Space Lab jáne Med365 jobalary – bizdiń akseleratordyń fınalısteri. Qatysýshylardyń árqaısysy berilgen múmkindikke laıyq. Biz jigitterdi maqtan tutamyz, olarǵa osy isterinde sáttilik tileımiz jáne olardyń úlken jetistikterge jetetinine senemiz», - delingen «Terrıkon alqaby» Instagram paraqshasynda.

Alaqan jobasy – alaqannyń tamyrlaryn tanýǵa arnalǵan bıometrııalyq júıe.

Smartestprep – kolledjde keńes berý men emtıhanǵa daıyndalýǵa arnalǵan jeke platforma, ol túlekterge baǵyty men qalaýlaryna negizdelgen ýnıversıtetter men baǵdarlamalardy usynady.

Med365 medıtsınalyq tekserýdiń avtomattandyrylǵan júıesi medıtsınalyq tekserýdi avtomattandyrýǵa jáne tsıfrlandyrýǵa baǵyttalǵan, bul onyń sapasy men jyldamdyǵyn arttyrýǵa múmkindik beredi.

Al, NEO (Space lab) 3D tehnologııasyn qoldana otyryp, shet tilderin oqytýdyń anımatsııalyq formatyn usynady.

AQSh-ta oqytý Qazaqstan men Dúnıejúzilik banktiń, Tsıfrlyq damý, ınnovatsııalar jáne aeroǵarysh ónerkásibi mınıstrliginiń bastamasy, sondaı-aq Astana Hub-tyń Draper University-men yntymaqtastyǵy arqasynda múmkin boldy.