Qaraǵandy ınspektorlary balyqtardy qutqarý úshin muzdy tesip, sańylaý jasap jatyr

QARAǴANDY. QazAqparat – Qaraǵandy orman jáne janýarlar dúnıesin qorǵaý jónindegi memlekettik ınspektorlar Nura-Sarysý oblysaralyq basseındik balyq sharýashylyǵy ınspektsııasynyń ınspektorlarymen birlesip oblystyń ózen-kólderinde shuńqyr tesip, muzdy burǵylap jatyr, dep habarlaıdy QazAqparat tilshisi.

Balyq qutqarý sharalary Abaı jáne Buqar jyraý aýdandarynda Kishi Sarykól men Petrovkada uıymdastyrylǵan.

Ol naýryz aıynyń sońyna deıin rezervtik balyq sharýashylyǵy sý aıdyndarynda jalǵasady.

Sýdy ottegimen qanyqtyrý úshin sańylaý jasaý qajet. Qar men aıaz - sýdaǵy janýarlar úshin naqty problema.

Sebebi qalyń muz ben qar jamylǵysy sý obektilerine ottegi men jaryqtyń túsýine kedergi bolady, deıdi mamandar.

Bul balyqtyń jappaı qyrylýyna ákelýi múmkin.

Mundaı qubylystardyń aldyn alý úshin sańylaýlardy burǵylaý jáne olardy qamyspen toltyrý arqyly balyqtardyń qyrylýynyń aldyn alý sharalary júzege asyrylady.

Bul rette aýa ósimdikter arqyly sýdyń túbine ótedi.

«Balyq qutqarý jumystary jyl saıyn jáne tek rezervtik sý aıdyndarynda júrgiziledi. Bekitilgen sańylaýlardy tabıǵat paıdalanýshylar burǵylaıdy. Búgingi kúni memlekettik ınspektorlardyń qorǵaýynda 98 rezervtik balyq sharýashylyǵy sý aıdyny bar», - dep habarlady Qaraǵandy oblysynyń tabıǵı resýrstar jáne tabıǵat paıdalanýdy retteý basqarmasy.

Balyqtyń jappaı qyrylýyna qarsy is-sharalar sý janýarlaryna sońǵy aıazdy kúnderden aman-esen shyǵýǵa jáne kóktemgi muzdyń erýin jáne sý obektileriniń ashylýyn kútýge múmkindik beredi.