Qaraǵandy haıýanattar baǵynyń eń qart turǵyny 32 jasqa toldy
QARAǴANDY. QazAqparat - Qaraǵandy haıýanattar baǵynyń eń kári turǵyny - «Emý» atty túıequs bıyl 32 jasqa toldy, dep habarlaıdy QazAqparat tilshisi.
Zoobaq jumysshylarynyń aıtýynsha, túıequs Emý - Avstralııany mekendeıtin aıdarly túıequstar otrıadynyń eń iri ókili. Ony turqyna qarap, alyp qus deýge bolady, degenmen Afrıka túıequsyna qaraǵanda denesi shaǵyndaý. Búkil denesin qaýyrsyn jaýyp turady. Alystan qaraǵanda uzyn aıaǵy bar, júrip bara jatqan shóp maıasyna uqsaıdy.
Qusty 1986 jyly Dondaǵy Rostov zoobaǵynan ákelgen.
«Kelýshiler únemi oǵan nazar aýdarady. Ásirese balalar ony jaqsy kóredi. Ol da qonaqjaı, qashan qarasańyz baısaldy júrgeni», - deıdi zoobaq jumysshysy Tolqyn Sapar.
