Qaraǵandy gımnazııalarynyń biriniń túlegi UBT-dan eń joǵary ball jınady
QARAǴANDY. Maýsymnyń 7-si. QazAqparat /Valentına Elızarova/ - Búgin Qaraǵandyda Ulttyq biryńǵaı test tapsyrý barysynda №38-shi gımnazııanyń túlegi Ekaterına Mıtko eń joǵarǵy kórsetkish 125 ball jınady. Bul týraly qalalyq bilim bóliminen habarlady.
«Biz óte rızamyz. Búkil oblys boıynsha bul jalǵyz ǵana óte joǵarǵy kórsetkish. Jalpy búgin qaraǵandylyq túlekter ózderin jaqsy kórsete bildi», dep atap ótti Qaraǵandy qalalyq bilim bóliminiń bastyǵy Jambyl Jylbaev.
Qaraǵandy oblysynda UBT ótken jumada, maýsymnyń 5-inde bastaldy. UBT-nyń alǵashqy kúninde Balqash, Jezqazǵan qalalarynyń aýyldyq mektepteriniń 2637 synyp bitirýshileri test tapsyrdy. Oblystyq bilim berý basqarmasynyń málimetteri boıynsha, alǵashqy kúnniń qorytyndysyna sáıkes ortasha ball 77,2-ni quraıdy. Al «Altyn belgige» úmitkerlerdiń 47,2 paıyzy, úzdik atestatqa úmitkerlerdiń 22 paıyzy óz bilimderin dáleldeı aldy. «Búgingi kúnniń qorytyndysy shyǵarylý ústinde», deıdi oblystyq bilim berý basqarmasynyń qyzmetkerleri.
Aǵymdaǵy jyly Qaraǵandy oblysynda mektep bitirýshilerdiń 80 paıyzy, ıaǵnı 7500-ǵa jýyq túlek UBT tapsyrady. Óńirde JOO-lar men mektepter bazasynda UBT tapsyratyn 14 pýnkt uıymdastyrylyp, test tapsyratyn kúnder maýsymnyń 5-i, 7-si jáne 9-yna belgilengen. Oblysta «Altyn belgige» 236, al úzdik atestatqa 131 úmitker bar.
