Qaraǵandy farmatsevtıka kesheni elordaǵa 100 myńnan astam vaktsına jóneltti
QARAǴANDY. QazAqparat - Qaraǵandy farmatsevtıkalyq kesheni elordaǵa revaktsınatsııa júrgizý úshin «Spýtnık V» preparatynyń júz myńnan astam dozasyn jóneltti, dep habarlaıdy QazAqparat farmatsevtıka kesheniniń Telegram paraqshasyna silteme jasap.
«Qazaqstanda koronavırýs ınfektsııasyna qarsy ımmýndaý jumystary josparlanǵan qarqynmen júrýde, vaktsına jetispeýshiligi joq. Búgin Qaraǵandy farmatsevtıkalyq kesheni elordaǵa revaktsınatsııa júrgizý úshin «Spýtnık V« preparatynyń júz myńnan astam dozasyn jóneltti. Nur-Sultan qalasyna otandyq óndiristegi reseılik vaktsınanyń II komponentiniń 103 085 dozasy jetkiziledi», delingen habarlamada.
Búgingi tańda 326 699 astanalyq turǵyn koronavırýs ınfektsııasyna qarsy ekpeniń birinshi komponentin alǵan. 219 488 adam vaktsınatsııanyń tolyq kýrsynan ótti.
Aıta keterligi, Qazaqstanda jappaı vaktsınalaý naýqany bastalǵannan beri 5 145 055 adam vırýsqa qarsy preparattyń I komponentin aldy. II komponentpen 3 264 705 azamat egildi.
