Qaraǵandy eriktileri 13 myńnan astam otbasyna azyq-túlik pen gıgıena quraldaryn taratty

QARAǴANDY. QazAqparat - Qaraǵandy eriktileri men kásipkerleri tótenshe jaǵdaı kezinde kóp balaly jáne az qamtylǵan otbasylarǵa, jalǵyz basty qarttarǵa, múgedekterge jáne basqa da asa muqtaj sanattaǵy turǵyndarǵa 106,8 tonna azyq-túlik jáne gıgıena quraldaryn taratty, dep habarlaıdy QazAqparat tilshisi.

15 naýryzdan 6 mamyrǵa deıingi aralyqta eriktiler 698 qaıyrymdylyq aktsııasyn ótkizdi. Olar 13 663 otbasyna nemese 49 891 adamǵa 42,8 mln teńgeden astam qarajat mólsherinde kómek kórsetti.

Qaıyrymdylyq aktsııasyna kásipkerler, sharýa qojalyqtary, sondaı-aq Qaraǵandy oblysynyń turǵyndary belsendi qatysty. Mysaly, «BIPEK AVTO - AZIıA AVTO» kompanııalar toby, Qaraǵandy oblysynyń Qazaqstan halqy Assambleıasy, Qaraǵandy avtoáýesqoılar klýby, Vogue meıramhanasy, «Janel» dámhanasy, «Jandos» JK jáne basqa da kóptegen adamdar muqtaj jandarǵa kómek kórsetti.

Volonterler, kásiporyndar men kómek kórsetkisi keletinder osy qıyn ýaqytta óńir turǵyndaryna birneshe ret betperde taratty. Osylaısha, 43 836 dana maska jasaldy.

Sondaı-aq, Túrkistan oblysynda sý basqan aýyl turǵyndaryna kómek retinde qaraǵandylyq volonterler gýmanıtarlyq júk jiberdi, al jas jezqazǵandyqtar 2 kún ishinde zardap shekkender úshin 10 mln teńgeden astam qarajat jınady.

Osy jyldyń 7 sáýirinde qurylǵan Saryarqa Jastary oblystyq eriktiler shtaby belsendi jumys isteýde. Munda qońyraý shalyp, kómek suraýǵa bolady. Volonterler tapsyrys qabyldap, jalǵyzbasty qart adamdarǵa nemese múmkindigi shekteýli adamdarǵa dúkennen azyq-túlik jáne gıgıena quraldaryn, dárihanadan dári-dármekterdi jetkizedi. 7 sáýirden 6 mamyrǵa deıin eriktilerge oblys turǵyndarynan kómek surap 1 250 qońyraý kelip túsken.

Búgingi tańda shtabta 240 erikti eńbek etedi. Erikti kómekshiler baılanyssyz rejımde jumys isteıdi - qajetti zattardy úıge kirmeı-aq beredi.