Qaraǵandy emhanalaryna qandaı shaǵymdar jıi kelip túsedi

Qaraǵandy qalasynyń №1 emhanasynda patsıentterdi qoldaý jáne ishki baqylaý qyzmeti bes jyldan beri jumys istep keledi. Onyń quramyna sarapshy dárigerler, medbıkeler jáne medıtsınalyq psıholog kiredi.

«Qoldaý qyzmeti mamandarynyń jumysy patsıentterdiń ótinishin taldaýdy, daýly jaǵdaılardy kásibı basqarýdy qamtıdy. Kóbinese bizge dári-dármekpen qamtamasyz etý, salalyq mamandardyń qabyldaýyna jazylý, qosalqy merdigerlik uıymdarda medıtsınalyq kómek kórsetý boıynsha suraqtar qoıylady. Emhanaǵa tirkelý jáne balalardy ana sútin almastyrǵyshpen tegin qamtamasyz etý jóninde de ótinish bildiredi. Árbir shaǵym boıynsha qyzmettik tekserý júrgiziledi, hattama jasalady. Eger dárigerdiń kinási rastalsa, onda emhana dırektorymen birge tártiptik jaza belgilenedi», - dedi Elena Korneeva.

Sondaı-aq, patsıentterdi qoldaý qyzmeti densaýlyq saqtaý standarttaryna sáıkes kórsetiletin medıtsınalyq qyzmetterge ishki baqylaý júrgizedi. Sarapshy dárigerler halyq alǵan medıtsınalyq kómektiń kólemi men sapasyna medıtsınalyq saraptama jasap, anyqtalǵan medıtsınalyq qatelikterge taldaý júrgizedi.

«Aı saıyn bizdiń qyzmetke 60-70 ótinish túsedi. Onyń ishinde 10-ǵa jýyǵy hattama retinde rásimdelgen qyzmettik shaǵym. Qazir MÁMS engizilýine baılanysty ótinishter sany artty. Kóptegen patsıentter emhanaǵa júgingenge deıin óz mártebesin bilmeıdi», - dep túsindirdi spıker.

Aptasyna úsh ret ártúrli mamandyqtaǵy dárigerler Instagram-da tikeleı efırde suraqtarǵa jaýap beredi, onda ár joly №1 emhananyń patsıentterdi qoldaý jáne ishki baqylaý qyzmetteriniń telefondarynyń - 50-28-27 jáne 8-708-436-80-37 nómirleri aıtylady.

Esterińizge sala keteıik, 2015 jyldan bastap medıtsınalyq uıymdarda «Halyq densaýlyǵy jáne densaýlyq saqtaý júıesi týraly» Qazaqstan Respýblıkasy Kodeksiniń 58-babyna sáıkes patsıentterdi qoldaý jáne ishki baqylaý qyzmetteri jumys isteıdi.

Olardyń mindeti - «patsıent - emhana» problemalyq máselelerin anyqtaý jáne halyqqa medıtsınalyq kómek kórsetý sapasyn jaqsartý.