Qaraǵandy drama teatrynda «Raqymjannyń Qasymy» spektakliniń premerasy ótti
Qazaqstan memlekettik syılyǵynyń laýreaty, akter-dramatýrg Keńes Jumabekovtiń «Raqymjannyń Qasymy» pesasy boıynsha Qazaqstannyń eńbek sińirgen qaıratkeri, rejısser Bolat Uzaqov (Nur-Sultan qalasy) sahnalady.
Qazaq poezııasynyń kóginde juldyz bolyp jarqyrap, ásem án bolyp shalqyǵan Qasym aqynnyń týǵan jerin saǵynyp, kógildir Kent taýlaryn ańsap jyr tolǵaǵan sátterinen bastalady da, birte-birte balalyq shaǵyna oıysady.
Pesa avtory Keńes Jumabekovtyń aıtýynsha, qoıylymnyń negizgi oıy qazaqtyń daýylpaz aqyny Qasym Amanjolovtyń ómiri jaıly ǵana emes, qazaq dalasynda aýyz toltyryp aıtarlyqtaı iri tulǵalarymyzdyń bolǵanyn keler urpaqqa jetkizý bolyp tabylady.
Spektaklde Qasym ómiriniń birneshe kezeńi qamtylǵan, sondyqtan da sahnada ár kezeńdegi Qasym obrazyn teatrdyń birneshe akteri somdaıdy.
«Dramada keltirilgen málimetter aqynnyń óz shyǵarmalaryna jáne tarıhı derekterge negizdelgen. Qasym týraly kezinde onyń zamandastary kóp jazǵan. Sol derekterdi 4-5 jyl aralyǵynda jınaqtap, osy dramany jazdym. Aqynnyń árbir óleńiniń shyǵý tarıhy, qıyndyq kórip, jetim qalǵany – barlyǵy osynda qamtylyp, kórsetilgen. Spektaklde rejısserdiń kontseptsııasy boıynsha kemeldengen Qasymnyń kóz aldynan onyń búkil ómiri ótedi. Aldymen bala Qasym, úlkenderden bata alatyny, ákesiniń qaıtys bolyp, jetim qalýy, anasy basqa adammen turmys qurǵanda onyń Semeıge jaıaýlatyp ketetini, alǵash ret pıanıno men mandalındi kórip, osy aspaptarda oınaýdy úırenetini, eseıgende Oralǵa barǵany – barlyǵy kórsetilgen», – deıdi Keńes Jumabekov.
Poetıkalyq dramada sonymen qatar Qasymnyń ánderi oryndalady.
Aqyn ánderin oryndaıtyn teatrdyń jas artısterinen quralǵan hormen jumys istegen hormeıster Qazaqstannyń eńbek sińirgen qaıratkeri Amantaı Jumashev (Nur-Sultan).
