Qaraǵandy depýtattary jerasty ótkelderin tekserýdi talap etti
ASTANA. QazAqparat - Qaraǵandy qalalyq máslıhatynyń depýtattary bıliktiń jerasty ótpe joldaryna saraptama jasaýyn talap etti, dep habarlaıdy QazAqparat óńirlik nv.kz saıtyna silteme jasap.
Halyq qalaýlylary tozyǵy jetken jerasty ótkelderinde tótenshe jaǵdaı oryn alady dep qaýiptenip otyr.
"Jerasty jaıaý júrginshiler joly - strategııalyq nysandar», - deıdi qalalyq máslıhattyń hatshysy Qudaıbergen Beksultanov. - Eger olar qırap qalsa, avtomobıl qozǵalysy buzylady. Barlyq jerasty joldary qalanyń negizgi kúre joldarynda ornalasqan. Sondyqtan, olardyń jaǵdaıynan habar alý kerek. Saraptama júrgizý kerek».
Bul sózder Qazybek bı aýdanynyń ákimi Tatıana Shatohınaǵa joldandy. Óz kezeginde ol depýtattardyń sózin quptady jáne jerasty joldarynyń ıeleri óz menshigindegi joldardy retke keltirgenin, bul jumystardyń Qaraǵandy ákimi Nurlan Áýbákirovtiń tapsyrmasymen oryndalyp jatqanyn málim etti.
«Qazirgi ýaqytta Kenshiler mádenıet úıi men Ortalyq dúkenge shyǵatyn joldarǵa jóndeý jumystary júrgizildi, kóńil kónshiterlik sanıtarlyq jaǵdaıǵa keltirildi, - dedi Tatıana Shatohına. - Sondaı-aq, biz pandýs jasaý máselesin de kóterip otyrmyz. Bul týraly shaǵymdanýshylar kóp».
Sonymen birge, aýdan ákimi Kenshiler mádenıet úıi men Ortalyq dúkenge shyǵatyn jol ıeleriniń ondaǵy saýdagerlerdi tarqatyp jibergenin atap ótti. Endi munda sapasyz taýar satatyn jaımalar bolmaıdy, dúkender ǵana qaldyryldy. Al «1001 usaq-túıek» dúkeni janyndaǵy ótpe jolda jaǵdaı qıyndaý. Onda áli kúnge deıin samsa, shelpek, kıim jáne aıaq kıimder beıbereket satylýda.
«Bul jóninde jergilikti polıtsııamen birlesip jumys istep jatyrmyz», - dep óz sózin túıindedi aýdan ákimi.
