Qaraǵandy dárigerleri júrek tusynan jaralanǵan er adamdy qutqardy
QARAǴANDY. QazAqparat - Qaraǵandyda №1 qalalyq aýrýhana hırýrgteri pyshaq jaraqatymen túsken naýqasqa kúrdeli ota jasady, dep habarlaıdy QazAqparat tilshisi.
24 mamyr túnde Qaraǵandynyń №1 qalalyq aýrýhanasynyń qabyldaý bólimine kóptegen jaraqaty bar naýqas kelip túsken.
Hırýrgtardyń kezekshi brıgadasy perekard tamponadasy bar júrek jaraqatynyń sıpatyn der kezinde jáne durys anyqtaǵan. Dárigerlerdiń jedel áreketi naýqasty ólim aýzynan alyp qalýǵa septigin tıgizgen.
«Shuǵyl túrde joǵary sanatty hırýrgter Ǵalym Qaltaev, Zahıtjan Omarhodjaev jáne anestezıolog, professor Baýyrjan Aısanov júrekke oń jaq qarynshany tigý arqyly operatsııa jasady», - dep túsindirdi Qaraǵandy oblysy densaýlyq saqtaý basqarmasynyń baspasóz qyzmeti.
№1 qalalyq aýrýhana medıtsına qyzmetkerleriniń jedel jáne durys áreketiniń arqasynda naýqas tiri qaldy jáne qazirgi ýaqytta esin jıǵan.
Polıtsııa qyzmetkerleri er adamdy pyshaqtaǵan kúdiktini qolǵa túsirdi. Tártip saqshylarynyń aıtýynsha, oqıǵa turmystyq kelispeýshilik saldarynan oryn alǵan. Qazirgi ýaqytta QR QK 106-baby 1-bóligi boıynsha sotqa deıingi tergeý bastaldy.
«Oktıabr PB krımınaldyq polıtsııa bóliminiń qyzmetkerleri izdestirý barysynda 26 jastaǵy qala turǵynyn anyqtady. Ol zardap shegýshimen birge ishimdik iship otyryp, sózge kelip qalǵanyn aıtty. Kıkiljiń sońynda kúdikti azamat janyndaǵy joldasyna pyshaq salǵan», - dep málimdedi Qaraǵandy oblystyq PD baspasóz qyzmeti.
