Qaraǵandy dárigerleri kesar tiliginiń jańa tásilin meńgerdi

QARAǴANDY. QazAqparat – Qaraǵandy oblystyq klınıkalyq aýrýhanasynyń № 1 perınataldyq ortalyǵynyń basshysy Janar Jarova jańa ádisterdi qoldanyp, «kesar tiligi» operatsııasyn ótkizdi. Oǵan Omby memlekettik medıtsına ýnıversıtetiniń akýsherlik jáne gınekologııa kafedrasynyń meńgerýshisi, professor Sergeı Barınov kómek kórsetti, dep habarlaıdy QazAqparat tilshisi.

Organ saqtaý operatsııasy kezinde Qazaqstanda alǵash ret Jýkovskıı ádisi boıynsha eki ballondy tamponada men metroplastıka jasaldy. Bul ádisti Omby memlekettik medıtsına ýnıversıtetiniń dárigerleri oılap tapqan jáne áıeldiń jatyrynda birneshe tilik bolǵan jaǵdaıda qoldanylady. Bul ádis akýsherlik qan ketýdi azaıtýǵa jáne jatyrdy saqtaýǵa múmkindik beredi. Sonymen birge bolashaqta áıelge taǵy bir júktilikke múmkindik beredi.

Professor Sergeı Barınov perınataldyq ortalyqta «Akýsherlik saladaǵy shuǵyl jaǵdaılarda hırýrgııalyq kómek kórsetý jáne protsesti basqarý» sheberlik sabaǵyn ótkizdi. Dárigerlerge keńes berilip, klınıkalyq jaǵdaılardy taldaý jáne jańa ádisterge oqytý ótkizildi.

«Biz bul sheberlik sabaǵyn kúttik. Buryn ortalyqta mundaı operatsııalar jasalǵan joq. Jańa ádisti qoldana otyryp, biz bosanǵannan keıingi qan ketý men organdy kesý operatsııalarynyń sanyn tómendetip, analarymyz úshin qaýipterdi azaıtamyz dep úmittenemin. Bul ádisti qoldanǵan soń áıelder operatsııadan keıin 1,5–2 jyldan keıin kelesi júktilikpen keledi dep snenemiz», – deıdi Janar Jarova.