«Qaraǵandy bulttardan bıik» baǵdarlamasy qanat qaqty
QARAǴANDY. QazAqparat - Qaraǵandyda týrızm mádenıetin damytýǵa baǵyttalǵan joba qanat qaqty. Bul týraly QazAqparat oblys ákiminiń saıtyna silteme jasap habarlaıdy.
«Qaraǵandy bulttardan bıik» týrıstik baǵdarlamasynyń ashylýyn qala ákimdigi men mádenıet jáne tilderdi damytý bólimi qarjylandyrǵan. Jańa Maıqudyq MÁ men «Temirtaý jastar klýby» oblystyq týrıstik klýbpen birlesip uıymdastyrdy.
«Bizdiń mindetimiz - belsendi týrızmdi damytý. Qazir bul baǵyt memleket tarapynan úlken qoldaýǵa ıe bolýda. Biz aldymen jastar arasynda týrıstik mádenıetke degen qyzyǵýshylyqty joǵarylatýǵa tyrysamyz. Eki jyldan beri belsendi týrızm boıynsha oqytýshylardy daıyndaý baǵytynda semınarlar ótkizip kelemiz. Osy ýaqyt aralyǵynda 600-den astam adam saıahattardy uıymdastyrý biliktiligin arttyrdy. Birqatar baǵdarlamalar ázirledik. 2000-nan astam oqýshy at ústinde júrýdi úırendi», - dep atap ótti oblystyq týrıstik klýb dırektory, QR týrızm jáne sport salasynyń qurmetti eńbekkeri Sergeı Kıstanov.
Bıyl Aqtoǵaı aýdanyndaǵy Bektaý ata shatqalynda ornalasqan «Fakel» saýyqtyrý lagerinde týrıstik-ólketaný ekspedıtsııalyq jasaqtarynyń oblystyq forýmy ótti.
Klýb mamandary «Meniń Otanym - Qazaqstan» jobasy aıasynda balalar-jasóspirimder týrızmin damytý tujyrymdamasyn qurýǵa qatysty. Týrızm negizderin oqytý ólketanýmen tyǵyz baılanysty.
Mine, bul maqsattar «Qaraǵandy bulttardan bıik» týrıstik baǵdarlamasyna negiz boldy. Onyń aıasynda taqyryptyq semınarlar men sheberlik-synyptary ótkiziledi. Jańa Maıqudyq mádenıet úıinde «Arqar» týrıstik klýby qurylǵan.
70 jastan quralǵan alǵashqy top jınaqtaldy jáne Temirtaýda olar oqýǵa kiristi. Oqytý aıaqtalǵan soń tájirıbelik bólimi qarastyrylǵan: tyńdaýshylar Qarqaralyǵa baryp, óz qoldarymen shatyrly lager turǵyzyp, ózderin saıahatta synaı alady.
