Qaraǵandy bazarynda tórt kúnde 2 adam mert boldy: Mán-jaı anyqtalýda
QARAǴANDY. QazAqparat – Qaraǵandy qalasyndaǵy «Gornıak» bazarynda 33 jastaǵy er adam kóz jumdy. Úsh kún buryn tártip saqshylary osy jerden áıeldiń máıitin tapqan bolatyn, dep habarlaıdy QazAqparat tilshisi.
Qazirgi ýaqytta osy eki jaǵdaıdyń mán-jaıy anyqtalyp jatyr, sot-medıtsınalyq saraptama júrgizilýde.
Áleýmettik jelilerdegi málimetke sáıkes, 9 maýsym kúni «Gornıak» aıaldamasynda ornalasqan dúkenge kireberiste er adam jazataıym oqıǵa saldarynan qaza tapty. Marqum qaladaǵy fırmalardyń birinde ekspedıtor bolyp qyzmet atqarǵan. Ol áleýmettik pavılonǵa taýar alyp kelgen. Kýágerlerdiń aıtýynsha, dúkennen shyǵaberiste baspaldaq súıenishine qoly tıgen er adamdy toq soqqan. Alaıda, Qaraǵandy ákimdigi bul faktini joqqa shyǵarady.
«Áleýmettik jelilerde Maıqudyq shaǵynaýdanynda elektr togynyń soǵýyna baılanysty jas jigittiń qaza bolǵany týraly aqparat taralýda. Qaraǵandy qalasy Polıtsııa basqarmasynyń málimetinshe, er adamnyń ólimi aldyn ala nusqa boıynsha, densaýlyq jaǵdaıynan bolǵan.
Atalǵan faktige sáıkes, sot-medıtsınalyq saraptama taǵaıyndaldy. Tergeý amaldary júrgizilýde.
Merziminen buryn qorytyndy jasamaýdy jáne tekserilmegen aqparatty taratpaýdy suraımyz. Saraptama qorytyndysy boıynsha sebep anyqtalady», - dep habarlady Qaraǵandy qalasy ákimdiginiń baspasóz qyzmetinen.
Oqıǵaǵa qatysty oblystyq Polıtsııa departamenti de túsinik berdi.
«9 maýsymda polıtsııaǵa dúkenderdiń birinde er adamnyń máıiti tabylǵany týraly habarlama kelip tústi. Oqıǵa ornyna shyqqan kezde fakti rastaldy: saýda núktesiniń mańynda denesinde zorlyq-zombylyq belgileri joq 33 jastaǵy er adamnyń máıiti tabyldy. Bul fakti polıtsııada tirkeldi. Sot-medıtsınalyq saraptama taǵaıyndaldy, onyń nátıjeleri boıynsha is júrgizý sheshimi qabyldanatyn bolady. Polıtsııa qyzmetkerleri oqıǵanyń mán-jaıyn anyqtap jatyr», - dedi Qaraǵandy oblysy PD baspasóz qyzmetinen.
Polıtsııa aqparatyna súıensek, dál osy jerde tórt kún buryn 36 jastaǵy áıel mert boldy. Onyń ólimine densaýlyq jaǵdaıy sebep bolǵany habarlanýda.
«6 maýsymda sol aýdanda denesinde zorlyq-zombylyq belgileri joq 36 jastaǵy áıeldiń máıiti tabyldy. Sot-medıtsınalyq saraptama onyń óliminiń sebebi júrek aýrýy – «keńeıtilgen kardıomıopatııa« ekenin anyqtady», - dedi polıtsııadan.
