Qaraǵandy: Basty nazarda - qala kórki
ASTANA. 28 mamyr. QazAqparat - Qaraǵandy qalasyndaǵy qalaqurylysy keńesiniń kezekti otyrysynda «Absolıýt» saýda úıin qaıtadan jaraqtandyrý jáne onyń mańaıyn abattandyrý máselesi jan-jaqty talqylandy,
dep habarlady qala ákimdiginiń baspasóz qyzmeti.
Ortalyq ámbebap dúkeni men «Absolıýt» saýda úıiniń aldyndaǵy alań qala ortalyǵy bolyp tabylady. Sondyqtan da onyń qalanyń sáýletine sán beretindeı ǵımarat bolýyna basa nazar aýdarý qajet. Osyny eskergen qala sáýletshileri arnaıy joba ázirleýge baılanysty konkýrs jarııalap, úzdik dep tanylǵanyn iske asyrý jóninde sheshim qabyldaǵan bolatyn. Nátıjesinde 8 joba talqyǵa túsip, ozyq dep tanylǵan úsheýi alqaly basqosýda taǵy da talqyǵa salyndy.
Máselen, sáýletshi Aleksandr Baıkov saýda úıiniń qasbetin aına sııaqty shynymen qaptap, syrttaı qaraǵanda alańnyń aýmaǵy keńeıe túskendeı kúıge engizýin usynsa, Ramazan Áýbákirovtiń jobasy ozyq úlgidegi eýropalyq astanalardyń keıpin aıǵaqtaıdy. Juqa shynymen qaptalǵan ǵımarat alystan kóz tartyp, ásirese túngi mezgilde ǵımarattyń ishki bezendirilýi de alaqandaǵydaı kórinip turady.
Degenmen, Sabyrjan Dáýitbergenovtiń jobasy keńes músheleriniń kóńilinen shyǵyp, biraýyzdan maquldandy. Kenshiler qalasynyń dáýletine sáýletiniń saı keletindigin aıǵaqtaıtyn joba jańa tehnologııa júıesimen úılesip, jarasymdyǵyn tapqan. Saýda kesheniniń astyńǵy qabatynda avtoturaq ornalastyrý kózdelgen. Sonymen qatar qalalyqtardyń demalyp, serýendeıtin alańdary da tıisti talapqa saı jabdyqtalǵan ári jasyl jelekke bóleý máselesi de nazardan tys qalmaǵan. Joba avtorlary atalǵan isti júzege asyrýǵa eshbir sáýlet ónerine qatysy joq, talǵamsyz ári júıesiz salynǵan jurtshylyq arasynda «tıtanık» atalynyp ketken úlkendi-kishili ǵımaratsymaqtardyń kedergi keltirip turǵandyǵyna qynjylys bildirip, keleshekte olardy múldem alyp tastaý kerektigine nemese kórer kózge qorashtaý kórinetin bólikterin tıisti talapqa keltirý týraly pikirlerin bildirdi. Keıingi jobamen salynatyn ǵımarattar kesheni qala kórkine sán berip, ortalyq kósheniń ajarlana túsýine negiz qalaıtyn bolady degen qala qurylysy keńesiniń músheleri sońǵy usynys negizinde jumysty odan ári jalǵastyrý týraly biraýyzdy sheshimge keldi.
