Qaraǵandy basshylyǵy merdigerlerge 1500 sharshy metr joldy óz esebinen jóndetpek
QARAǴANDY. QazAqparat - Ótken jyly joldardy jóndeýmen aınalysqan qaraǵandylyq merdiger kompanııalar óz qarajattaryna 1500 sharshy metr joldardy jóndeýleri tıis. Sebebi olar tósegen asfalt kepildi merzimi aıaqtalmaı jatyp jaramsyz bolyp qalǵan, dep habarlaıdy QazAqaparat tilshisi.
Qazirgi tańda Qaraǵandyda 152 jol kepildi merzimde. Ol degenimiz 2 mln 450 sharshy metr asfalt. Qalalyq ákimdiktiń mamandary ótkizgen tekserýlerdiń qorytyndysy boıynsha 1500 sharshy metr jol jabyny qaıta jóndelýi tıis - ol jalpy kólemniń 0.06 paıyzyn quraıdy.
«Barlyq osy ýchaskeler boıynsha merdigerlerge uıǵarym berildi. Olar aýa raıy jaqsarǵan bette aqaýlardy óz esebinen joıýlary tıis. Kepildik merzimi - úsh jyl. Eger jóndeý jumystary nashar ótkizilse, keıin qaıta qalpyna keltiriletin bolady», - dep túsindirdi Qaraǵandy ákiminiń orynbasary Sábıt Ospanov.
Merdigerlerdiń ózderi jol tóseminiń tez buzylýynyń sebepteri - sapasyz bıtým, qatal klımat, erigen sý jáne qozǵalys qarqyndylyǵynyń joǵary bolýy ekenin aıtady.
Bıylǵy jyly Qaraǵandy qalasynda 16 qalalyq jáne 18 oramaralyq joldar kúrdeli jóndeýden ótedi, onyń 12-si Oktıabr aýdanynda jáne 6-aýy Qazybek bı atyndaǵy aýdanda ornalasqan.
Sondaı-aq, bıylǵy jyly Magnıtogorskaıa jáne Karl Marks kóshelerin kúrdeli jóndeýden ótkizý josparlanyp otyr. Onda asfalt tolyǵymen aýystyrylyp, sý aǵarlar, jaıaý júrginshiler men tehnıkalyq trotýarlar jasalady.
