«Qaraǵandy – Balqash» tasjoly jyl sońyna deıin ashylady
QARAǴANDY. QazAqparat - Qaraǵandy oblysynda júrgizýshiler jyl sońyna deıin jańartylǵan «Qaraǵandy – Balqash» tasjolymen júre alady. Bul týraly respýblıkalyq mańyzy bar avtomobıl jolynyń ýchaskelerin tekserý barysynda «QazAvtoJol» UK» AQ basqarma tóraǵasy Ulan Álipov málimdedi.
QR Indýstrııa jáne ınfraqurylymdyq damý mınıstrligi baspasóz qyzmetiniń málimetterine qaraǵanda, uzyndyǵy 363 shaqyrymdy quraıtyn «Qaraǵandy – Balqash» tasjolyn qaıta jańartý jumystary 2019 jyly bastalǵan bolatyn. Qazirgi tańda tasjoldyń barlyq ýchaskelerinde qurylys-montajdaý jumystary belsendi túrde júrgizilip jatyr.
Naqtyraq aıtqanda, jer qazý jumystarynyń 73% (22,7 mln tekshe metr) oryndalǵan. Sondaı-aq, joldyń 95 shaqyrymynda jol negiziniń qosymsha qabaty, 41 shaqyrymynda jol negiziniń tómengi qabaty, 68 shaqyrymynda jol negiziniń joǵarǵy qabaty, 58 shaqyrymynda jol jabyndysynyń tómengi qabaty tóseldi. Budan bólek, jol salasynyń qyzmetkerleri 165 sý ótkizý qubyryn ornatyp úlgerdi.
Qaıta jańartýdan ótken soń jol 4 jolaǵy bar І-b tehnıkalyq sanatyndaǵy jolǵa sáıkestendiriletin bolady. Aıta ketý kerek, joldy keńeıtý ýchaskelerdegi qaýipti jerler sanyn azaıtyp, joldyń kólikti ótkizý qabiletin birneshe esege arttyra túspek.
Joba boıynsha 28 kópir men jol ótkelderi, 377 sý ótkizý qubyry, demalys alańdary men eldimekender mańynda avtopavılondar ornatylýy tıis.
Merdigerlik uıymdar – «SP KazGerStroı» jáne CITIC Construction Co.Ltd kompanııalary. Qurylys jumystaryna tehnıkanyń 1720 birligi, 2250 adam jumyldyrylǵan. 500 adam – nysanǵa jaqyn ornalasqan eldi mekenderdiń turǵyndary.
