Qaraǵandy-Balqash avtojolyn qaıta jańǵyrtý jumystary bıyl bastalady
ASTANA. QazAqparat - QR Indýstrııa jáne ınfraqurylymdyq damý mınıstri Roman Sklıar jumys saparymen Qaraǵandy oblysyna bardy. Bul týraly QazAqparat mınıstrliktiń baspasóz qyzmetine silteme jasap habarlaıdy.
Ol ótken jyldyń qarasha aıynda bolǵan iri apattan keıin qaıtadan óndiristik protseske kirisip jatqan «ArselorMıttal Temırtaý» kombınatyna baryp, sondaı-aq basqa birqatar óndiristik kásiporyndardyń qyzmetimen tanysty. Budan bólek Roman Sklıar Temirtaý-Qaraǵandy avtojolyn qaıta jańǵyrtýmen aınalysyp jatqan merdigerlermen kezdesti. Osy jerde mınıstrge óńirdegi joldardyń damý barysy aıtyldy.
«Qaraǵandy oblysy ónerkásip óndirisiniń ósimin kórsetip otyr. Jańa kásiporyndar ashylýda. Budan bólek, kólik logıstıkasy damyp keledi. Bıyl Qaraǵandyny aınalyp ótetin joldyń qurylysy aıaqtalady. Sondaı-aq, bıyl uzaqtyǵy 363 shaqyrym bolatyn Qaraǵandy-Balqash avtojoly ýchaskesin qaıta jańǵyrtý jumystary bastalady», - dedi Roman Sklıar.
Jalpy qaıta jańǵyrtýǵa 143 mlrd. teńge qarjy jumsalady, onyń 2019 jylǵa 24,4 mlrd. teńgesi bólindi. Jobany 2022 jylǵa deıin kezeń-kezeńimen júzege asyrý josparlanýda.
Qaraǵandy oblysynyń ákimi Erlan Qoshanov pen mınıstr Temirtaý-Qaraǵandy avtojolynda jumys istep jatqan kompanııany synǵa aldy. Birinshiden, merzimi sozylyp ketti. Ekinshiden, merdigerler aqaýǵa jol berdi. Sonyń saldarynan jańa jol ýchaskesinde jaryq paıda boldy. Merdiger kompanııa «SeıSer» kelisilgen merzimde óz qarajattary esebinen aqaýdy qalpyna keltirip, qaıta jasaýy tıis. Olaı istemegen jaǵdaıda kásiporyn «qara tizimge» ilinedi, dep eskertti Roman Sklıar.
«ArselorMıttal Temırtaýda» mınıstrge metallýrgııalyq kombınat birinshi toqsannyń qorytyndysy boıynsha ótken jyldyń qýatyna shyǵady dep baıandady. Kúni keshe ǵana úshinshi konverter qatarǵa qosyldy. «ArselorMıttal Temırtaý» AQ atqarýshy dırektory Vadım Basınniń aıtýynsha, búgingi tańda táýligine 9,5 myń tonna bolat óndiriledi. Bıyl kompanııa ónim óndirisin 3,8 mln. tonnadan 4,5 mln. tonnaǵa deıin arttyrýdy josparlap otyr.
Temirtaý elektr metallýrgııalyq kombınatyna barǵan kezde kásiporynda damytý jobasy talqylandy. Onyń quny shamamen 5-7 mlrd. teńgeni quraıdy. Kombınatta jańa peshtiń qurylysyn júrgizý josparlanýda. Ol ferroqorytpa óndirisin eki esege arttyrýǵa jáne ónim jelisin keńeıtýge múmkindik beredi. Mınıstr kásiporynnyń memlekettik qoldaý quraldaryn paıdalana alatyn bolady, dep ýáde berdi.
Sonymen qatar, Roman Sklıar aýqymdy jańǵyrtý jumystary júrgizilgen Qaraǵandydaǵy quıý mashına jasaý «Maker» JShS-ń qyzmetimen de tanysty. Sondaı-aq ol«Fıtohımııa» AQ halyqaralyq ǵylymı-óndiristik holdıngi jáne «Qaraǵandy farmatsevtıkalyq kesheni» JShS-de boldy.
