«Qaraǵandy – Balqash» avtojoly merziminen buryn paıdalanýǵa beriledi
NUR-SULTAN. QazAqparat - «Qaraǵandy – Balqash» avtojoly merziminen buryn paıdalanýǵa beriletin boldy. «QazAvtoJol» UK» AQ Basqarma tóraǵasy Ulan Álipov «QazAvtoJol» ulttyq kompanııasynyń tikeleı efırinde sóılegen sózinde osyndaı jańalyqpen bólisti, dep habarlaıdy QazAqparat tilshisi.
«Qaraǵandy – Balqash avtojolynyń arasy – 363 shaqyrym. Qazir onda tolyqqandy jóndeý jumystary júrgizilip jatyr. Biz kelesi jyldyń sońyna deıin ol joldy aıaqtaımyz. Bálkim usaq-túıek jumystar qalýy múmkin», - dedi Ulan Álipov.
Kompanııa basshysynyń aıtýynsha atalǵan joldy jospar boıynsha 2023 jyldyń mamyr aıynda aıaqtaý kózdelgen.
«Biraq qazir jumysty jedeldetip, kelesi jyldyń sońyna deıin aıaqtaıyq dep otyrmyz», - dedi ol.
Eske sala ketsek buǵan deıin Ulan Álipov «Nurly jol 2» baǵdarlamasy boıynsha qyzý jumys júrgizilip jatqanyn málim etken edi.
«Bıyl bizdiń elde jóndeý jumystarymen 4 myń shaqyrym jol qamtyldy. Jalpy «Nurly jol 1» jáne «Nurly jol 2» baǵdarlamasy boıynsha jospardy oryndap kelemiz. ıAǵnı 2015-2020 jyl aralyǵynda «Nurly jol 1» baǵdarlamasy boıynsha jumysty aıaqtap, 13 myń shaqyrym joldy qaıta jóndeýden ótkizdik. 8 myń shaqyrym joldy І jáne ІІ sanatty joldardyń qataryna engizdik. Bıyldan bastap «Nurly jol 2» baǵdarlamasy bastaldy», - dedi ol.
