Qaraǵandy balabaqshalarynyń birinde balalar hlordan ýlanyp qaldy

QARAǴANDY. QazAqparat – ekaraganda.kz aqparat agenttigine qaraǵandylyqtar habarlasyp, qaladaǵy balabaqshalardyń birinde balalar hlordan ýlanyp qalǵanyn aıtqan. Ata-analardyń sózinshe, bireýler asqazanyn shaıdyryp, jeńil ótse, endi biriniń óńeshi kúıgen, dep habarlaıdy QazAqparat ekaraganda.kz agenttigine silteme jasap.

Ata-analardyń biri Alına Lıvanshonyń balasynyń bul balabaqshaǵa baryp júrgenine birneshe jyl bolǵan. Ananyń aıtýynsha, oqıǵa 10 shilde keshke bolǵan. Balaǵa óńeshtiń jáne asqazannyń ekinshi dárejeli hımııalyq kúıigi degen dıagnoz qoıyldy. Qazir ol balalar aýrýhanasynda em alyp jatyr. Balanyń jaǵdaıy qalypty, biraq otbasy rentgen nátıjesin kútip otyr.

Oblystyq densaýlyq saqtaý basqarmasy ýlanǵan bala 10 shilde kúni Kópbeıindi oblystyq balalar aýrýhanasyna túskenin aıtty.

«Balany tekserip, em taǵaıyndadyq. Qazirgi ýaqytta onyń jaǵdaıy qalypty, qanaǵattanarlyq deýge bolady. Shyǵýǵa daıyndalyp jatyr», - dep tolyqtyrdy mekeme.

Qaraǵandy qalalyq bilim berý bólimi 11 shildede, ıaǵnı oqıǵadan bir kúnnen keıin kináli adamdar tártiptik jaýapqa tartylǵanyn atap ótti:

«2023 jyldyń 10 shildesinde «Báıterek» bóbekjaı-balabaqshasy» KMM-da shamamen 18:30 shamasynda serýenge shyqqan «Erketaı» tobynyń balalary sý suraǵan soń, tárbıeshi topqa baryp sháınekten sý quıyp alǵan. Al oǵan tárbıeshiniń kómekshisi sháınekti qaqtan tazartý úshin bir tabletka deo-hlor salyp qoıǵan bolyp shyqty. Tárbıeshi bul týraly bilmegen. Eki bala eritindiden birneshe urttam ishken. Medıtsına qyzmetkeri 18:55-te jedel járdem brıgadasyn shaqyrdy. 11 shildede kináliler – medıtsına qyzmetkeri, tárbıeshi, tárbıeshiniń kómekshisi tártiptik jaýapqa tartyldy», - dep habarlady mekeme.