Qaraǵandy avıatsııalyq bazasyna «Sý-30SM» joıǵysh ushaqtary jetkizildi
Ushaqtar Reseıden tikeleı reıspen keldi, olardy Irkýtsk avıatsııalyq zaýytynyń tájirıbeli synaq ushqyshtary jetkizdi, dep habarlaıdy QazAqparat tilshisi.
Jaýyngerlik tehnıkany tapsyrý saltanatty jaǵdaıda ótti. Saltanatty sharaǵa QR Qorǵanys mınıstri general-leıtenant Nurlan Ermekbaev, QR QK Áýe qorǵanysy kúshteriniń Bas qolbasshysy avıatsııa general-leıtenanty Nurlan Ormanbetov, Qaraǵandy oblysynyń ákimi Jeńis Qasymbek qatysty.
«Jańa avıatsııalyq tehnıka Qazaqstan Qarýly Kúshterin qaıta jaraqtandyrý josparyna sáıkes Áskerı-áýe kúshterine kelip túsedi. «Sý-30SM-niń» óte manevrli kóp maqsatty joıǵyshtary áýe shabýylynan, áýe jáne jerdegi nysandardy anyqtaý men joıý quraldarynan áskerler men nysandardy qorǵaý múmkindigin edáýir arttyrady. Olardyń arqasynda Qarýly Kúshterdiń jaýyngerlik áleýeti artady», - dep atap ótti Nurlan Ermekbaev.
«Sý-30SM» 4++ jańa býyndy joıǵysh. Ol kúndiz-túni, kez-kelgen aýa-raıynda áreket ete alady. Jaýdyń ushaqtaryn atyp, jerdegi nysandardy joıyp qana qoımaı, áýe barlaýyn júrgizip, basqa ushaqtarǵa maqsat qoıa alady. Ol uzaq qashyqtyqqa jáne aýada janarmaı quıý múmkindigine ıe.
Qazaqstannyń «Irkýt» avıatsııalyq zaýytymen yntymaqtastyǵy bes jyl buryn bastaldy.
Reseılik synaq ushqyshy Maksım Kolıýshınniń aıtýynsha, «Sý-30SM» álemdegi eń tıimdi áskerı ushqyshtardyń biri.
«Men bul ushaqpen 2012 jyldan beri ushyp júrmin. Bizde qazaqstandyq ushqyshtarmen erteden qalyptasqan dostyǵymyz bar. Kimge senetinimizdi bilemiz», - deıdi ol.
Qaraǵandy avıatsııalyq bazasynyń ushý jáne ınjenerlik-tehnıkalyq quramy Taldyqorǵanda jáne osy ushaqty daıyndaýshy zaýytta tolyq qaıta oqytýdan ótti. Osy tıptegi ushaqtardy ushýǵa, paıdalanýǵa jáne olarǵa qyzmet kórsetýge tıisti ruqsattar alyndy.
«Qaıta oqytý eki kezeńde ótti - teorııa jáne tájirıbe. Men osy klastaǵy ushaqpen ushatynyma qýanyshtymyn. Men alǵash ret 2015 jyldyń 27 tamyzynda ushtym. Sodan keıin kýrsant boldym. Sol kúnnen bastap ómirimdi avıatsııaǵa arnaýdy uıǵardym», - dedi jas ushqysh Temirlan Báımenov.
Jeńis Qasymbek áskerı qyzmetkerlerdi búgingi mańyzdy oqıǵamen quttyqtady.
«Keńes Odaǵynyń Batyry Nurken Ábdirovtyń esimimen atalatyn Avıabaza - Qaraǵandynyń maqtanyshy. Sizder qoıylǵan mindetterdi laıyqty atqaratyndaryńyzǵa senimdimin. Jańa jyl qarsańynda qyzmette tabys, jaqyndaryńyzǵa, otbasylaryńyzǵa densaýlyq, amandyq jáne ashyq aspan tileımin», - dedi óńir basshysy.
