Qaraǵandy aýrýhanasy jyldyń úzdik statsıonary atandy
QARAǴANDY. QazAqparat – Professor H. J. Maqajanov atyndaǵy kópsalaly aýrýhana jyldyń úzdik statsıonary dep tanyldy. Medıtsınalyq mekeme «Halyqtyń súıiktisi» ulttyq syılyǵynyń qorytyndysy boıynsha marapatqa ıe boldy. Daýys berýdiń sońǵy kezeńi syılyqtyń lubimec.kz resmı saıtynda ótti, dep habarlaıdy QazAqparat tilshisi.
Bul joly syılyqtyń uıymdastyrýshylary men qazylar alqasy medıtsına qyzmetkerleri men eriktilerdi erekshe atap ótti. H. J. Maqajanov atyndaǵy aýrýhananyń da jumysy laıyqty baǵalandy.
Aýrýhana pandemııa kezinde alǵashqylardyń biri bolyp bar aýyrtpalyqty kótere bildi.
Búginde klınıkada 1 200-ge jýyq adam jumys isteıdi. Onyń ishinde 300 medıtsına qyzmetkeri koronavırýs indeti kezinde kúndiz-túni vahtalyq ádispen jumys istedi.
«Bul biz úshin kútpegen jańalyq boldy, men qatty tańdandym», - deıdi aýrýhana dırektory Erkin-Dáýir Qurmanǵalıev.
Statsıonar basshysy barlyq qazaqstandyqtarǵa sanıtarlyq rejımdi saqtap, betperde kııýdi umytpaı, talaptarǵa túsinistikpen qaraý kerektigin eskertedi.
