Qaraǵandy áýejaıynda pılottyq rejımde avıajolaýshylardyń aımaqtyq qonýy iske qosylady

QARAǴADY. QazAqparat – Qaraǵandy áýejaıynda «Aımaqtyq qoný» jobasyna qatysý josparlanýda. Kenshiler qalasyndaǵy áýe aılaǵy bul jobany 10 qyrkúıekten bastap pılottyq rejımde iske qosýdy josparlap otyr, dep habarlaıdy QazAqparat tilshisi.

Qaraǵandy áýejaıynda «Aımaqtyq qoný» jobasynyń iske qosylǵany týraly Azamattyq avıatsııa komıtetiniń baspasóz qyzmeti habarlady.

«Jobanyń negizgi ıdeıasy – jolaýshylardy aımaqtyq tehnologııa boıynsha, ıaǵnı toptar boıynsha otyrǵyzýdy júzege asyrý. Bul áýejaılarda bolǵan kezde azamattarǵa qyzmet kórsetý sapasy men jyldamdyǵyn aıtarlyqtaı arttyrady. Joba sheńberinde jolaýshylardy otyrǵyzý áýe kemesiniń bortynda alatyn ornyna baılanysty júzege asyrylatyn bolady. Bul rette erip júrýshileri joq balalar men júrip-turýy shekteýli jolaýshylar qoldanystaǵy zańnamaǵa sáıkes basym tártippen negizgi kezekten tys ótetin bolady», - delingen habarlamada.

Vedomstvonyń habarlaýynsha, pılottyq jobaǵa Air Astana, Fly Arystan jáne SCAT áýe kompanııalary qatysady. Aımaqtyq qoný tek teleskopııalyq traptary bar áýejaılarda: Nur-Sultan, Aqtaý, Aqtóbe, Túrkistan jáne Qaraǵandyda júzege asyrylady. Joba úsh aıǵa eseptelgen. Sátti júzege asatyn bolsa, aımaqtyq qonýdy bolashaqta turaqty qoldaný týraly sheshim qabyldanady.