Qaraǵandy áýejaıynda oqtalǵan tapansha alyp ótpek bolǵan azamatsha ustaldy

Bul týraly búgin jýrnalısterge arnalǵan baspasóz máslıhatynda Kóliktegi Ortalyq ІІD Krımınaldyq polıtsııa basqarmasynyń múliktik qylmystardy ashý jónindegi bólimshe bastyǵy Dáýlet Maqsutov habarlady.

Ústimizdegi jylǵy shildeniń 14-inde Kóliktegi Ortalyq ІІD qyzmetkerleri jedel-izdestirý sharalaryn ótkizý kezinde Qaraǵandy áýejaıynyń júk bólimshesinde «Qaraǵandy-Sochı» baǵytyndaǵy áýe reısin tirkeý kezinde 1960 jylǵy L. esimdi azamatsha ustaldy.

Onyń qobdıshasyn tekserý kezinde, ol jerden nómirleri óshirilgen «Baıkal» markaly tapanshasy men 9 mm kalıbrli 8 oq tabyldy.

«Jasalǵan saraptamaǵa sáıkes, atalmysh tapansha gazdy tapanshadan uńǵysyn aýystyrý arqyly atys qarýyna ózgertilgen otty qarý bolyp tabylady. Tárkilengen 8 oq atýǵa jaramdy», - dep túsindirdi polıtsııa maıory Dáýlet Maqsutov.

Atalmysh fakti boıynsha «Qarýdy zańsyz ustaý, saqtaý, satyp alý, jasaý jáne satý» baby boıynsha qylmystyq is qozǵaldy.

D.Maqsutovtyń aıtýynsha, áıel ustaý kezinde balalarymen birge bolǵan. Buryndary sotty bolǵan eken. Qazirgi ýaqytta ustalǵan azamatshanyń barlyq baılanystary tekserilýde.