Qaraǵandy áýejaıynda elý jastaǵy áıeldiń sómkesinen atys qarýy tabyldy
ASTANA. Shildeniń 16-y. QazAqparat /Aıdar Ospanalıev/ - 2010 jyldyń shilde aıynyń 14-inde Kóliktegi ortalyq ishki ister departamentiniń qyzmetkerleri Qaraǵandy qalasy áýejaıynyń júk bóliminen elý jastaǵy L. degen áıeldi ustap,
onyń sómkesinen 9 mılımetrlik «Baıkal» tapanshasyn tapty.
Kóliktegi ortalyq ishki ister departamentiniń Memlekettik til jáne aqparat bóliminiń bastyǵy Maqpal Kósherbaevanyń aıtýynsha, tapansha gazben atylatyn pıstoletten atys qarýyna laıyqtalyp, jasalǵan. Tekserý barysynda tapanshamen qosa onyń 8 oq salynǵan oqpany da tabyldy. «Osyǵan baılanysty Qazaqstan Respýblıkasynyń Qylmystyq kodeksiniń 251-shi babynyń
1-shi tarmaǵy boıynsha, ıaǵnı atys qarýyn zańsyz alyp júrdi jáne saqtady, atys qarýyn daıyndady degen aıyppen qylmystyq is qozǵaldy. Qazirgi tapanshanyń qandaı jolmen daıyndalǵandyǵy jáne ony ne maqsatpen alyp bara jatqandyǵy, sonymen qatar ustalǵan áıel azamat qarym-qatynas jasaıtyn azamattar tekserilýde. Buǵan qosa áıeldiń qandaı da bir qylmystyq toptar men dinı uıymdarǵa qatystylyǵy da tekserilýde», dedi bólim bastyǵy.
Onyń sózine qaraǵanda, ustalǵan azamatty Jelilik ishki ister bóliminiń qyzmetkerleri Qaraǵandy-Sochı baǵytynda ushqaly turǵan №418 áýe reısin tirkeý kezinde arnaıy kelip túsken aqparattar negizinde qolǵa túsirgen.
