Qaraǵandy áýejaıyna Gonkongtan jetkizilgen 19 tonna júk kedendik baqylaýdan tys ótkizilmek bolǵan

NUR-SULTAN. QazAqparat – Qaraǵandy qalasynyń «Sary-Arqa» áýejaıyna Gonkongtan jetkizilgen júk durys deklaratsııalanbaǵan. Muny «Áýejaı-Qaraǵandy» keden beketiniń qyzmetkerleri anyqtady. Bul týraly Memlekettik kirister komıteti málim etti, dep habarlaıdy QazAqparat.

«Usynylǵan tasymaldaý qujattaryn taldaý barysynda kedendik tasymaldaýshy halyqaralyq poshta jóneltilimderi túrinde jalpy massasy 19 tonna shoǵyrlandyrylǵan ekspress júk taýaryn málimdegeni anyqtaldy.

Kedendik resimdeý reglamentine sáıkes halyqaralyq poshta jóneltilimderi kedendik baqylaý nysandarynan jeńildetilgen tártippen ótedi. Kommertsııalyq júkter kedendik baqylaýdyń barlyq nysandaryn qoldana otyryp, kedendik resimdeýden ótedi. Tıisinshe, halyqaralyq poshta jóneltilimderi túrindegi kommertsııalyq júkti deklaratsııalaı otyryp, deklarant kedendik baqylaýdan jaltarady. Bul – EEK Sheshimderin buzý», - delingen málimdemede.

Qazir durys deklaratsııalanbaǵan taýarlarǵa qatysty kedendik tekserý júrgizilip jatyr. Belgili bolǵanyndaı, onyń ishinde qol saǵattary, kompıýterlik pernetaqta, balalarǵa arnalǵan jáne basqa da zattar bar.

Materıaldar Qaraǵandy oblysy boıynsha ekonomıkalyq tergeý departamenti avtomattandyrylǵan aqparattyq derekter qorynyń esebine tirkelgen.

Qaraǵandy oblysy boıynsha memlekettik kirister departamenti QR Keden kodeksiniń 34-babyna sáıkes, EAEO kedendik aýmaǵyna ákelinetin taýarlar odaqtyń kedendik shekarasynan ótken sátten bastap kedendik baqylaýda bolatynyn eske salady.

Foto: kgd.gov.kz