Qaraǵandy: Aýdarylǵan batýttyń ıesi órt sóndirý bóliminiń burynǵy bastyǵy bolǵan
QARAǴANDY. QazAqparat - Qaraǵandy qalasynyń ortalyq saıabaǵynda aýdarylǵan batýttyń qojaıyny Abaı qalasyndaǵy órt sóndirý bóliminiń burynǵy bastyǵy bolǵan, dep habarlaıdy QazAqparat tilshisi.
Osyǵan deıin Qaraǵandy oblysynyń Polıtsııa departamenti «Bala ólimine ákelip soqqan úrmeli batýtty qoldanysqa engizgen Qaraǵandy qalasynyń 40 jastaǵy turǵyny «saýyq nysanyn zańsyz ári, talapqa saı ornalastyrmaǵany» úshin ustalyp, ýaqytsha ustaý oqshaýlaǵyshyna qamalǵany týraly habarlaǵan bolatyn.
Qaıǵyly oqıǵaǵa sebep bolǵan batýttyń qojaıyny buryn Órt sóndirý qyzmetiniń bastyǵy qyzmetin atqarǵany belgili boldy.
«Ol buryn Órt sóndirý qyzmetiniń bólimshelerinde jumys istedi. Abaı qalasynda ornalasqan órt sóndirý bóliminiń bastyǵy qyzmetin atqardy. 20 mamyrda ol jumystan bosatý týraly raport bergen», - dep habarlady Qaraǵandy oblysy TJD baspasóz qyzmeti.
Sondaı-aq, batýt resmı túrde sheneýniktiń zaıybynyń atyna tirkelgeni de anyqtalǵan. Alaıda, ony ornatý, paıdalaný jáne tasymaldaý boıynsha barlyq uıymdastyrý máselelerimen burynǵy sheneýniktiń ózi aınalysqan.
Batýt zańdy nemese zańsyz ornatylǵany tóńireginde de kóptegen suraqtar týyndady. Bul máselege qatysty mádenıet, demalys saıabaqtary men gúlzarlar basqarmasy er adamnyń parkke batýtty alyp kelip, óz betinshe ornatqanyn málimdegen. Úrmeli attarktsıon ıesinen basqarma qyzmetkerleri ruqsattama qaǵazyn suraǵanda, ol kelisimshart qujattaryn úıinde umytyp ketkenin aıtqan.
H. Maqajanov atyndaǵy Qaraǵandy oblystyq travmatologııa ortalyǵynyń jetekshisi Erik Shonbaev atalǵan oqıǵadan zardap shekken balalar týraly aıtty.
«Búgingi tańda balalardyń jaǵdaıy turaqty, turaqty-aýyr. Barlyq qajetti medıtsınalyq kómekti balalar tolyq kólemde aldy. Barlyq qajetti tekserýler júrgizildi. Balalardy neırohırýrgter, travmatologtar, balalar reanımatologtary sekildi birneshe mamandar qarap shyqty. Qazir olar táýlik boıy baqylaýda. Qazirgi ýaqytta balalardyń ómirine esh qaýip tónip turǵan joq. Balalar klınıkalyq aýrýhanasyna jatqyzylǵan balada bas jaraqaty, qabyrǵasy synǵan, ishtiń aýyr jaraqaty bar. Bizge, Maqajanov klınıkasyna jatqyzylǵan balanyń bas jaraqaty, qoly men aıaǵy synyp, jeńil jaralanǵan jerleri anyqtaldy. Saıabaqta barlyǵy bes adam zardap shekti. Olardyń bireýi Jedel járdem kelgenshe kóz jumdy, tórteýi Qaraǵandy qalasynyń travmoortalyqtaryna jetkizildi. Ázirge balalardy palataǵa aýystyrý týraly aıtý erte. Balalar jan saqtaý bóliminde, dárigerlerdiń jiti baqylaýynda bolady», - dedi Erik Shonbaev.
Esterińizge sala keteıik, 25 mamyr kúni Ortalyq mádenıet jáne demalys saıabaǵynda batýt aýdarylyp qalǵan bolatyn. Oqıǵa saldarynan 11 jasar bala kóz jumdy. Oqıǵaǵa baılanysty qylmystyq is qozǵaldy.
