Qaraǵandy attraktsıonyndaǵy ólim: Polıtsııa qylmystyq is babyn aýystyrdy
QARAǴANDY. QazAqparat – Qaraǵandy attraktsıonynda áıeldiń qaza bolýyna baılanysty oqıǵada jańa mán-jaılardyń anyqtalýyna oraı qylmystyq is baby qaıta aýystyryldy, dep habarlaıdy QazAqparat tilshisi.
Jeksenbi kúni «Sozvezdıe» qonaqúıiniń aýmaǵynda jazataıym oqıǵa oryn alǵan bolatyn. 9 qabatty qonaqúıdiń shatyryna ornatylǵan attraktsıonnan, ıaǵnı 25 metr bıiktikten sekirgen áıel jerdegi betondy qurylysqa qulady. Ol aýrýhanaǵa óte aýyr jaǵdaıda jetkizildi. Medıtsınalyq kómekke qaramastan, áıel qaıtys boldy.
Buǵan deıin polıtsııa qyzmetkerleri 32 jastaǵy áıeldiń ólimine baılanysty QR QK-niń 306-baby 1-bóligi «qaýipsizdik talaptaryna saı kelmeıtin taýarlardy shyǵarý nemese satý, jumystardy oryndaý ne qyzmetterdi kórsetý» boıynsha qylmystyq is qozǵaǵan bolatyn.
Alaıda, jańadan ashylǵan mán-jaılarǵa baılanysty qylmystyq is QR QK 306-babynyń 1-bóliginen QR QK 306-babynyń 3-bóligine qaıta aýystyryldy. Atalmysh baptyń úshinshi bóligine saı «Osy baptyń birinshi nemese ekinshi bólikterinde kózdelgen, abaısyzda adam ólimine ákep soqqan áreketter» boıynsha aıyp taǵylady. Aıyptalýshyǵa tórt jyldan segiz jylǵa deıingi merzimge bas bostandyǵynan aıyrý túrindegi jaza kózdelgen.
«Tergeý júrgizilýde. Osy qylmystyq is aıasynda polıtseıler attraktsıondy uıymdastyrýshynyń osy qyzmet túrine lıtsenzııasy bar-joǵyn, qaýipsizdik erejeleri saqtalǵanyn anyqtaıdy», - dedi Qaraǵandy oblysy PD baspasóz qyzmetinen.
