Qaraǵandy attraktsıonyndaǵy kisi ólimi: nusqaýshy 4 jylǵa sottaldy

QARAǴANDY. QazAqparat – Qaraǵandyda 34 jastaǵy Evgenııa Leontevanyń ólimine alyp kelgen roýp-djampıngtiń nusqaýshysyna sot úkimi shyqty. Sot sheshimimen ol 4 jylǵa bas bostandyǵynan aıyryldy, dep habarlaıdy QazAqparat tilshisi.

Qazybek bı aýdandyq soty roýp-djampıng nusqaýshysyn sapasyz qyzmet kórsetkeni, sonyń nátıjesinde Shahtınsk qalasynyń 34 jastaǵy turǵyny Evgenııa Leonteva qaza tapqany úshin kináli dep tanydy.

«Sot Aleksandr Mýznıkasty qaýipsizdigi ortasha QAJ mekemesinde jazasyn óteýmen tórt jylǵa bas bostandyǵynan aıyrdy. «Kúzetpen ustaý» bultartpaý sharasy ózgerissiz qaldyrylsyn. Jaza merzimi ony naqty ustaǵan sátten bastap, 2021 jylǵy 11 qazannan bastap eseptelsin. Jazany óteý merzimine qamaýda bolǵan ýaqyt jazany óteýdiń bir jarym kúni esebimen eseptelsin. Sottalǵan adamnan jábirlenýshilerge ótemaqy qoryna 158 340 teńge kóleminde májbúrli tólem óndirip alynsyn», - dep úkim shyǵardy Qazybek bı aýdandyq sotynyń sýdıasy Manat Jumaqaeva.

Alaıda nusqaýshy óz kinásin moıyndamady. Onyń aıtýynsha, ol «Fly Kazakhstan» JShS qyzmetkeri bolyr tabylmaıdy jáne sottalýshylar oryndyǵynda fırmanyń ıesi bolýy tıis.

Sondaı-aq, sýdıa qaza tapqan adamnyń anasy men jubaıynyń paıdasyna 6 mıllıon teńge mólsherinde moraldyq zalal somasyn óndirip alý týraly sheshim shyǵardy.

Esterińizge sala keteıik, 10 qazanda 33 jastaǵy Evgenııa Leonteva «Sozvezdıe» qonaq úıiniń tóbesindegi roýp-djampıng attraktsıonyna baryp, bıikten sekirgen bolatyn. Alaıda, bekitilmegen symnyń saldarynan ol beton qorshaýǵa qulap, aýrýhanada qaıtys boldy.