Qaraǵandy attraktsıonyndaǵy áıel ólimine qatysty nusqaýshynyń isi sotqa jetti
QARAǴANDY. QazAqparat – Roýdjampıng kezinde qaza bolǵan 33 jastaǵy áıeldiń ólimine qatysty qylmystyq is sotqa jiberildi. Atalmysh is Qazybek bı aýdandyq sotynda qaralady. Sot talqylaýy 14 sáýirge belgilendi. Kúdikti ótken jyldyń 11 qazanynan bastap qamaýda otyrdy, dep habarlaıdy QazAqparat tilshisi.
Roýdjampıng kezinde adam ólimi boıynsha nusqaýshyǵa qatysty qylmystyq is Qazaqstan QK-niń 306-babynyń 3-bóligi boıynsha sotqa joldandy.
Qylmystyq istiń mán-jaıyn Qaraǵandy oblysy PD bastyǵy Erlan Faızýllın óńirlik kommýnıkatsııalar qyzmetinde ótken eseptik kezdesý barysynda aıtyp berdi.
«Qylmystyq is sotqa joldandy. Tergeý uzaq ýaqytqa sozyldy, sebebi birqatar uzaq saraptamalar júrgizildi. Onyń ishinde Qostanaı qalasynda júrgizilgen sot saraptamalyq-tehnologııalyq zertteý de bar. Sarapshy eldegi osy baǵyttaǵy jalǵyz maman. Sondaı-aq, tergeýdi aıaqtaý úshin roýpdjampıngti uıymdastyrǵan kompanııanyń ıesin anyqtaý jáne jaýap alý úshin Reseı Federatsııasyna halyqaralyq tapsyrma jiberildi. Tapsyrmany oryndaǵannan keıin qylmystyq is sotqa jiberildi», - dedi Erlan Faızýllın.
Іsti Qazybek bı aýdandyq sotynyń sýdıasy Manat Jumaqaev qaraıdy.
Eske sala keteıik, 10 qazanda Qaraǵandyda roýdjampıng kezinde 33 jastaǵy áıel mert bolǵan edi. Ol «Sozvezdıe» qonaq úıiniń tóbesinen sekirip, jerdegi beton qurylymyna qulady.
Áıel shuǵyl túrde aýrýhanaǵa jatqyzylyp, bas súıegine trepanatsııa jasaldy, biraq dárigerler onyń ómirin arashalap qala almady.
Atalǵan fakti boıynsha polıtsııada Qazaqstan QK 306-babynyń 3-bóligi boıynsha qylmystyq is qozǵaldy.
Qylmys jasady degen kúdikpen 32 jastaǵy attraktsıon nusqaýshysy ustaldy.
Keıin anyqtalǵandaı, qaza tapqan áıel Shahtınsk qalasynyń 33 jastaǵy turǵyny bolǵan.
Bul sekirýdi oǵan jaqyndary týǵan kúnine syılaǵan. Marqumnyń sońǵy sekirýine onyń kúıeýi kýáger boldy, oqıǵa kezinde ol tómende áıelin kútip turǵan.
Áıeldiń sońynda eki balasy jáne asyrap alǵan jıeni qaldy.
