Qaraǵandy attraktsıonyndaǵy áıel ólimi: Qamalǵan nusqaýshy jazasyn jeńildetýdi surady
QARAǴANDY. QazAqparat – Qaraǵandyda 30 metr bıiktikten sekirip, mert bolǵan 33 jastaǵy áıeldiń óliminine kináli dep aıyptalyp otyrǵan attarktsıon nusqaýshysy appelıatsııaǵa ótinish berdi. Ol tergeý aıaqtalǵanǵa deıin bultartpaý sharasyn úı qamaýyna aýystyrýdy ótindi. Alaıda apellıatsııa alqasy sanktsııany ózgerissiz qaldyrdy, dep habarlaıdy QazAqparat tilshisi.
Qaraǵandyda áıel ólimine ákep soqqan roýd-djampıng atttraktsıonynyń 32 jastaǵy nusqaýshysyna tergeý kezinde «qamaýda ustaý» sanktsııasy bekitilgen bolatyn.
Aıyptalýshy sot alqasynan atalmysh sheshimdi qaıta qarap, úı qamaýyna nemese eshqaıda ketpeý týraly qolhat alý retinde jeńildetýdi surady.
Alaıda apellıatsııa alqasy sanktsııany ózgerissiz qaldyrdy.
«Qaraǵandy tergeý sotynyń «qamaýda ustaý» bultartpaý sharasyn tańdaý týraly qaýlysy ózgerissiz qaldy. Apellıatsııalyq shaǵym qanaǵattandyrylmaıdy», - dep málimdedi oblystyq sot.
Ustalǵan azamat tergeý aıaqtalǵanǵa deıin tergeý ızolıatorynda bolady. Qylmystyq is Qylmystyq kodekstiń 306-baby «Adam ólimine ákep soqqan, qaýipsizdik talaptaryna saı kelmeıtin qyzmetter kórsetý» boıynsha tergeledi.
Sot-medıtsınalyq saraptama, sot-narkologııalyq, sot-psıhıatrııalyq saraptama taǵaıyndaldy.
Esterińizge sala keteıik, 10 qazanda 33 jastaǵy áıel «Sozvezdıe» qonaq úıiniń tóbesinen sekirip, jerdegi beton qurylysqa soǵylǵan bolatyn. Áıel alǵan jaraqattarynan kóz jumdy .
Bir kúnnen keıin tergeýshi nusqaýshyny qamaýǵa aldy , sebebi qonaq úıdiń syrtqy beınekamerasynyń kadrlarynda attraktsıonnyń belbeýi durys bekitilmegeni baıqaldy.
13 qazanda sot kúdiktige «qamaýda ustaý» sanktsııasyn qoldaný týraly sheshim qabyldady.
