Qaraǵandy-Astana trassasyn qys aılarynda tazartý úshin eki ese kóp tehnıka jumyldyrylady
ASTANA. QazAqparat - Bıyl Qaraǵandy-Astana trassasyn qardan tazartýǵa ótken jylmen salystyrǵanda eki ese kóbirek tehnıka paıdalanylady. Osylaısha joldardy qar basyp qalý jaıttarymen kúresý kózdelip otyr, dep habarlaıdy oblystyq ákimdiktiń baspasóz qyzmeti.
Qaraǵandydan Astanaǵa deıingi jol bóligindegi Anar stantsııasynyń mańyndaǵy jol qazirdiń ózinde-aq qaraǵandylyq sheneýnikterdiń alańdaýshylyǵyn týǵyzyp otyr. Qysqy mezgilde ol jerde qar basyp qalý óte jıi oryn alady, sonyń saldarynan oblys ortalyǵynan elordaǵa ótý qıyndaıdy. Qys aılarynda osy jol bóligine jaýapty «KazahAvtoDor» kompanııasynyń basshylyǵy bul problemany sheshý úshin qosymsha tehnıka jumyldyrýdy josparlap otyr.
- «KazahAvtoDor» Anar stantsııasynyń mańyndaǵy jol ýchaskesine qosymsha 30 birlik tehnıka jaldaıdy, - dep málimdedi «KazahAvtoDor» UK» AQ Qaraǵandy oblystyq fılıalynyń dırektory Qanat Shaımın. - Taǵy qosymsha olardyń ózderiniń menshikti 11 birlik tehnıkasy bar. Ótken jyly, salystyrar bolsaq, shamamen jıyrma birlik tehnıka jumys istegen, biraq sonyń ózinde de úlgermegen. Bıylǵy jyly tehnıka jetkilikti, problemalar bolmaýy tıis dep oılaımyn.
Oǵan qosa, oblys boıynsha jalpy uzyndyǵy segiz shaqyrym qar toqtatqysh qurylǵylar ornatylǵan.
Sonymen qatar ótken jumada «KazahAvtoDor» JShS qaraǵandylyq fılıalynyń jańa basshysy taǵaıyndalǵan bolatyn. Ol laýazymǵa osyǵan deıin «KazAvtoJol» AQ Qaraǵandy oblystyq fılıaly dırektorynyń orynbasary qyzmetin atqarǵan Aıbol Bıdaıbekov taǵaıyndaldy.
