Qaraǵandy-Astana tasjolynda bolǵan jol apatynan eki adam qaza tapty
QARAǴANDY. QazAqparat - Eki adam qaza tapqan jol-kólik apaty Osakarovka kentine 20 shaqyrym qalǵan jerde bolǵan, dep habarlaıdy «QazAqparat» HAA tilshisi.
Aldyn ala derek boıynsha, «Lada Kalına» avtomobıliniń taksı júrgizýshisi róldi basqara almaı, joldyń oń jaq jıegindegi metall qorshaýǵa soǵylady. Keıin júrgizýshi apattyń aldyn alý úshin róldi solǵa buryp, joldyń arǵy betindegi jol jóndeý jumystaryna oraı kólik júrgizýshilerine joldy jaýyp turý úshin qoıylǵan beton taqtaǵa kirip ketedi.
Júrgizýshiniń uly Aleksandr habarlaǵandaı, ákesiniń eki jolaýshysy oqıǵa ornynda qaza tabady.
«Áıel adam men onyń 28 jastaǵy uly alǵan jaraqattarynyń saldarynan kóz jumdy. Ákemniń aıaǵy synǵan, mıy shaıqalyp, kóp jaraqat aldy», - dedi Aleksandr. 
Barlyq qaza tapqandar men jaraqat alǵandar - Osakarovka turǵyndary. Taksı júrgizýshisi eki jolaýshyny Qaraǵandyǵa alyp bara jatqan. 29 jastaǵy er adam búırekti aýystyrý boıynsha ota jasaýdan aldyn tekserýden ótý kerek bolǵan.
47 jastaǵy taksı júrgizýshisine gıps quıylyp, medıtsınalyq kómek kórsetilgennen keıin, ony ýaqytsha ustaý oqshaýlaǵyshyna qamaǵan.
Oǵan QR QK 345-baby «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» boıynsha aıyp taǵylýda.
