Qaraǵandy, Aqtóbe, Qostanaı oblystarynda sý tasý kezeńi aıaqtaldy - Qazgıdromet
NUR-SULTAN. QazAqparat - «Qazgıdromet» RMK Gıdrologııa departamentiniń dırektory Dıdar Jánibekuly úsh oblysta sý tasý kezeńi aıaqtalǵanyn aıtty, dep habarlaıdy QazAqparat tilshisi.
Alaıda ShQO, Almaty, Jambyl jáne Túrkistan oblystaryndaǵy jaǵdaı jaýyn-shashynnyń qanshalyqty deńgeıde jaýatynyna baılanysty.
«Bizdiń baqylaýdan alynǵan málimetterimiz boıynsha, qazirgi ýaqytta Qaraǵandy, Aqtóbe, Qostanaı oblystarynda sý tasqyny maýsymy bitti dep esepteýge bolady. Aqmola oblysynyń Esil ózeni, Astana sý qoımasyn da sol qatarǵa jatqyzýǵa bolady. Búgingi kúni Qalqutan, Jabaı ózenderiniń sý deńgeıleri qalypty. Biraq, búgin ne erteń ol ózenderde sý deńgeıi túsedi dep boljam jasap otyrmyz. Atalǵan aımaqtaǵy sýlardyń bári jınaqtalyp, SQO-da sý deńgeıiniń kóterilýine ákelip soqtyrdy», - deıdi Dıdar Jánibekuly OKQ-da ótken baspasóz máslıhatynda.
Onyń aıtýynsha, Shyǵys Qazaqstandaǵy jazyqtarda qardyń erý úrdisi tolyqtaı ótken. Qar tek taýly aımaqtarda saqtalǵan. Ol jaqtaǵy ózenderdiń sý tasqynynyń maýsymy - jaýyn-shashynnyń qanshalyqty deńgeıde jaýatynyna baılanysty bolady.
«Almaty, Jambyl jáne Túrkistan oblystaryndaǵy ózenderde osyndaı jaǵdaılar qalypty. Bul óńirlerdegi sý deńgeıleriniń kóterilýi - jaýyn-shashyn mólsherine jáne qansha kún jaýatynyna baılanysty bolmaq. Syrdarııa, Ertis, Shý, Talas, Jaıyq, Tobyl sekildi transshekaralyq ózenderdiń sý mólsheri joǵarǵy jaqta ornalasqan sý qoımalarynyń jumys rejimderimen eseptelip otyrady», - deıdi Dıdar Jánibekuly.
Dıdar Jánibekuly atap ótkendeı, Qazgıdromet óńdegen NASA jerserikteriniń jerdi qashyqtyqtan zondtaý sýretterine sáıkes, Qazaqstan aýmaǵynyń qar jamylǵysy 23 paıyzǵa (30-dan 7 paıyzǵa) azaıǵan. Qar jamylǵysy kóbinese saılarda, ormandy jáne taýly jerlerde saqtalyp otyr.
Eske sala ketsek, QR ІІM Tótenshe jaǵdaılar komıtetiniń tóraǵasy Vladımır Bekker búgin Qazgıdromettiń boljamyna alańdap otyrǵanyn jetkizgen bolatyn.
«Biz Qazgıdromettiń boljamyna alańdap otyrmyz. 10-12 sáýir kúnderi Almaty, Shyǵys Qazaqstan, Pavlodar men Aqmola oblystarynda qatty jaýyn-shashyn bolady degen boljam bar. Eger jańbyr kóp jaýsa, sý tasqyny ýshyǵyp ketýi múmkin. Aptanyń aıaǵyna deıin qatty jaýyn bolmasa eken deımiz. Sonda úlken sý Astraxan men Atbasarmen tezdetip ótedi de, bizge kóp problema týǵyzbaıdy», - dedi V.Bekker elordada ótken baspasóz máslıxatynda.
