Qaraǵandy ákimi Saǵyntaevqa óńirdegi birqatar problemalardy atap aıtty
QARAǴANDY. QazAqparat - QR Premer-Mınıstri Baqytjan Saǵyntaevtyń qatysýymen ótken jumys májilisi barysynda Qaraǵandy oblysynyń ákimi Erlan Qoshanov birqatar jobalardy iske asyrýǵa respýblıkalyq bıýdjetten qarajat bólýdi surady, dep habarlady «QazAqparat» HAA tilshisi.
Óńir ákimi mınıstrler kabıneti basshylaryna bes ótinish aıtty.
«Birinshisi - óńirge oblystyq klınıkalyq aýrýhanaǵa jańa ǵımarat kerek. Qazirgi korpýs 1940 jáne 1960 jyldary salynǵan. Úıjaı standartqa sáıkes kelmeıdi. Qazir 300 oryndyq kóp beıindi aýrýhana qurylysyna jobalaý-smetalyq qujattama ázirlenip jatyr. Jer ýchaskesi bólindi. Úsh jyldyq kezeńge arnalǵan respýblıkalyq bıýdjetten qarajat bólýdi suraımyn», - dedi ákim. Ekinshi másele - óńiraralyq oblystyq onkologııalyq dıspanserde bazalyq alań tapshy. Úshinshi másele - ákim úkimetten jylý qubyryn salýǵa 12 mlrd teńgeden astam qarajat bólýdi surady.
«Jańǵyrtylǵan JEO-3 qajetti kólemdi berýge ázir, alaıda ony tasymaldaý úshin uzyndyǵy 22 shaqyrym jylý qubyry qajet. Qajet soma 12 mlrd teńgeden astamdy quraıdy», - dedi Erlan Qoshanov.
Sondaı-aq oblys ákimi Qarajal qalasy men Jaırem kentin aýyz sýmen jabdyqtaý úshin aqsha bólýdi surady. «Qarajal jáne Jaırem halqyn sýmen qamtamasyz etý máselesi ótkir tur. 2007 jyly «Aýyzsý» memlekettik baǵdarlamasy aıasynda sý aǵyzý qurylǵysyn salý bastalǵan. Ol 2012 jyly aıaqtaldy. Nysan jumys sapasyz oryndalǵandyqtan, áli paıdalanýǵa engizilgen joq. Qazir sý qubyry ekinshi kezektegi máselege aınaldy. Qarjy jaǵynan qoldaý suraımyz», - dedi ákim.
Besinshi másele - Jezqazǵan men Sátpaevty sapaly aýyzsýmen qamtamasyz etý máselesi.
«Qurylys 7 jyl buryn bastalǵan. Jumys 2012 jyly bastalyp, sosyn qaıta jańartyldy. Tapsyrys berýshi aýyl sharýashylyǵy mınıstrliginiń aqparatyna sáıkes 2017 jyly jobany aıaqtaý josparlanǵan. Alaıda bul nysanda jumys áli kúnge júrgizilip jatyr. Shara qabyldaýyńyzdy suraımyn», - dedi ol.
Premer-Mınıstr Baqytjan Saǵyntaev ákimniń ótinishterin qaraýǵa qabyldady.
