Qaraǵandy ákimi kúnine 5 shaqyrym jaıaý júredi
QARAǴANDY. QazAqparat - Qaraǵandy ákimi Nurlan Áýbákirov aımaqtyq OKQ alańyndaǵy brıfıngte «QazAqparat» HAA tilshisiniń suraǵyna jaýap bere otyryp, óziniń qaladaǵy jaıaý serýenderi jaıly aıtyp berdi.
Qala basshysy bılik shynaıy ómirge jeke avtokóliginiń terezesinen ǵana qaraıdy dep sanaıtyn jurtshylyq synyn joqqa shyǵardy.
«Árıne, ómirdi tek jeke avtokóligińniń terezesinen ǵana qaraý, qysta jyly, jazda salqyn kabınette otyrý ońaı. Biraq, qala ákiminiń jumysy ózge memlekettik qyzmetkerlerdiń keńselik jumysynan sál erekshelenedi, - dedi N.Áýbákirov. - Máselen, búgin men úsh kóshede boldym. Sizderge ashyq aıtaıyn, tań atysymen qalada jaıaý júremin».
Qala basshysy nysandardy tekserý úshin senbi kúni qalany aınalyp shyǵatynyn eske saldy.
«Oǵan qosymsha, eger múmkindik bolsa, jaıaý júrgim keledi. Birinshiden, densaýlyqqa paıdaly, ekinshiden, bar máseleni óz kózińmen kórgen áldeqaıda jeńil», - dedi N.Áýbákirov.
Onyń aıtýynsha, ákim kúnine 5 shaqyrymǵa deıin jaıaý júredi.
Sonymen birge, Qaraǵandy ákimi jýrnalısterdi óziniń «táýelsiz kózderi» dep atap, problemalyq materıaldarǵa tezirek ún qatýǵa tyrysatynyn aıtty.
