Qaraǵandy ákimi kóshede kesilgen aǵashtarǵa qatysty vıdeoúndeý jarııalady
Qala turǵyndary men ekologtar aǵashtardyń bulaı kesilýine narazylyq bildirdi. Olardyń aıtýynsha, japyraq, butaǵynan aıyrylǵan aǵashtar endi qýrap qalýy múmkin, sebebi bul jumystar óz maýsymynda ǵana jasalýy tıis.
Oqıǵa ornyna barǵan qala ákimi vıdeo jazyp, kinálilerdi jaýapqa tartýǵa ýáde etti.
«Búgin qalada aqylǵa qonymsyz jaǵdaı boldy – qalamyzdyń basty kóshesi – Buqar jyraý dańǵylynda aǵashtardy dińine deıin kesip tastaǵan.
Kásipker Anjela Borısenko merdiger kompanııany jaldaǵan, olar jasyl jelekti sanıtarlyq butalaý normalaryn esh elemesten, kesý jumystaryn asa jırenishti ádispen jasaǵan. Kásipker máseleni talqylaý úshin osy jerge shaqyrylǵan edi. Biraq ol kelmedi. Onymen kezdesý erteńge josparlandy.
Qalaǵa osyndaı zalal keltirgen kásipker kompensatsııa retinde kóshetter otyrǵyzyp, zańnama boıynsha aıyppul tóleýge mindetteledi.
Aýdan ákimdigi qyzmetkerlerine keler bolsaq. Atalǵan jumysqa jaýapty maman erteń qyzmetinen bosatylady.
Abattandyrý bóliminiń basshylyǵy men onyń osy máselege jaýapty orynbasaryna qatysty qyzmettik tekseris júrgiziledi.
Qabyldanǵan sharalar týraly qosymsha habarlaımyn», - dep jazdy Qaraǵandy qalasynyń ákimi Facebook-tegi paraqshasynda.
vıdeo: 5-kanal
