Qaraǵandy: Ákim orynbasary alty jylǵa sottaldy
ASTANA. QazAqparat - Qaraǵandy qalasynda Abaı aýdany ákiminiń burynǵy orynbasary Dımash Súleımenovtiń para alý faktisi boıynsha qylmystyq is qaraldy, dep habarlaıdy QazAqparat tilshisi.
Sot materıaldaryna sáıkes, D.Súleımenov Qaraǵandy oblysynyń Abaı aýdany ákiminiń orynbasary retinde kommýnaldyq máselelerge jaýap bergen. Atalǵan qyzmetke deıin ol Abaı aýdandyq turǵyn úı-kommýnaldyq sharýashylyq, jolaýshylar tasymaly, avtomobıl joldary jáne turǵyn úı ınspektsııasy bólimin basqarǵan. Sol kezde «Abaı qalalyq parkin qaıta qurý» jobasy boıynsha konkýrs jarııalanǵan. Tapsyrystyń jalpy sommasy - 320 767 989 teńge. Memlekettik satyp alýlardyń qorytyndysy boıynsha ol jumys «Asar KZ» JShS-ǵa tapsyryldy. D.Súleımenovtiń ózi kelisimshartqa qol qoıǵan. Saıabaqty jóndeýdiń naqty merzimi de belgilengen. Súleımenov atqarylǵan jumystardy qabyldap alýdy ózi sheshetinin bilgen. Sol sebepti jekemenshik kompanııadan para alǵan. Dámhanalardyń birinde ótken kezdesýde «Asar KZ» JShS ókilderi oǵan 1 500 000 teńgeni bergen.
«Qazybek bı aýdandyq sotynyń sheshimine sáıkes, ákim orynbasary Qylmystyq kodekstiń 366-baby, 2-bóligi boıynsha kináli dep tanylyp, 6 jylǵa bas bostandyǵynyn aıyrý jazasyna kesildi. Qylmystyq jolmen tapqan múlki de tárkilenedi. Sot qaýlysy zańdy kúshine engen joq», - delingen sottyń resmı habarlamasynda.
Aıta keteıik, Abaı aýdany ákiminiń orynbasary Dımash Súleımenov ótken jyly jazda para alý ústinde ustalǵan bolatyn.
